آرمی چیف سے ہارورڈ یونیورسٹی امریکا کے طلباء کی جی ایچ کیو میں ملاقات

پاک فوج کے سربراہ جنرل عاصم منیر نے کہا ہے کہ پاکستان دہشت گردی کے خلاف کردار ادا کر رہا ہے اور عالمی برادری کو پاکستان کی جانب سے دی گئی بے پناہ قربانیوں کا ادراک کرنا چاہیے۔

پاک فوج کے شعبہ تعلقات عامہ کی جاری پریس ریلیز کے مطابق مختلف ممالک سے تعلق رکھنے والے ہارورڈ یونیورسٹی امریکا کے 38 طلباء کے ایک گروپ نے پاکستان کے دورے کے دوران جمعہ کو جی ایچ کیو میں آرمی چیف جنرل سیّد عاصم منیر سے ملاقات کی۔تعارفی نشست کے دوران، آرمی چیف نے علاقائی سلامتی کے مسائل اور خطے میں امن و استحکام کو فروغ دینے کے لیے پاک فوج کے کردار پر بات کی۔

آرمی چیف نے پاکستان کی بھرپور صلاحیتوں پر روشنی ڈالی اور شرکاء پر زور دیا کہ وہ پاکستان میں قیام کے دوران اپنے تجربات کی بنیاد پر پاکستان کو دیکھیں۔ آرمی چیف نے مقبوضہ کشمیر میں ہونے والے انسانی مصائب اور مظالم اور آبادیاتی حقائق کو تبدیل کرنے کی عزائم پر بھی روشنی ڈالی۔طلباء نے تعمیری بات چیت پر آرمی چیف کی تعریف کی۔