نواز شریف کی وطن واپسی کےلئے پارٹی رہنماؤں میں اتفاق

پاکستان مسلم لیگ (ن) کے قائد نواز شریف کی وطن واپسی کےلئے پارٹی رہنماؤں میں اتفاق ہو گیا۔

نواز شریف اکتوبر کے دوسرے ہفتے میں وطن واپس آئیں گے۔ لندن میں نواز شریف کی پارٹی رہنماؤں سے ملاقاتوں میں وطن واپسی اکتوبر میں کرنے پر اتفاق ہوگیا۔

ذرائع کے مطابق سابق وزیراعظم نواز شریف کی 15 اکتوبر کو وطن واپسی ہو سکتی ہے جبکہ تاریخ پر اتفاق شریف فیملی کی لندن میں ہونے والی بیٹھک میں ہوا۔ نواز شریف کی واپسی سے متعلق لندن میں اہم مشاورتی میٹنگ ستمبر کے پہلے ہفتے میں دوبارہ ہو گی۔

میٹنگ میں مرکزی رہنما اور پارٹی کی لاہور قیادت بھی شریک ہو گی، اس مشاورتی بیٹھک میں نواز شریف کی واپسی کے پلان کو حتمی شکل دی جائے گی۔ پارٹی ذرائع کے مطابق نواز شریف لاہور میں لینڈ کریں گے یا اسلام آباد، یہ معاملات بھی میٹنگ میں طے کئے جائیں گے۔