ایمان مزاری کو اڈیالہ جیل سے رہا ہوتے ہی دوبارہ گرفتار کر لیا گیا

ایمان مزاری کو اڈیالہ جیل سے رہا ہوتے ہی دوبارہ گرفتار کر لیا گیا،ایمان مزاری کو بارہ کہو میں درج مقدمے میں گرفتار کیا گیا۔ اسلام آباد کی انسداد دہشت گردی عدالت نے بغاوت اور اشتعال انگیزی کے کیس میں آج ایمان مزاری کی ضمانت منظور کی تھی جس کے بعد انہیں اڈیالہ جیل سے رہا کیا گیا تھا۔

ایمان مزار ی کی اڈیالہ جیل سے رہائی کے وقت اسلام آباد پولیس جیل کے باہر موجود تھی جہاں سے پولیس نے ان کو پھر گرفتار کرلیا۔ اسلام آباد پولیس کی جانب سے فوری طور پر ایمان مزاری کی گرفتاری کی کوئی وجہ نہیں بتائی گئی ہے تاہم جیل سے باہر آتے ہی پولیس انہیں لے کر روانہ ہوگئی۔

ایمان مزاری کو تھانہ بارہ کہو میں درج مقدمے میں گرفتار کیا گیا ہے، انہیں آج دھمکی ، بغاوت کے کیس میں عدالت نے درخواست ضمانت منظور کی تھی ۔

واضح رہے کہ 24 اگست کو بغاوت، دھمکانے اور اکسانے کے کیس میں اسلام آباد کی انسداد دہشت گردی عدالت نے ایمان مزاری اور علی وزیر کو جوڈیشل ریمانڈ پر اڈیالہ جیل بھیج دیا تھا۔