وزیر اعظم آج سے سعودی عرب کا تین روزہ سرکاری دورہ کر رہے ہیں

 تفصیلات کے مطابق   وزیر اعظم  عمران خان کے ہمراہ وزیر خارجہ شاہ محمود قریشی ،  کابینہ کے دیگر ارکان سمیت اعلیٰ سطحی  وفد بھی ہوگا۔وزیر اعظم اپنے دورے کے دوران سعودی قیادت سے معیشت ،تجارت ،سرمایہ کاری ،توانائی ،پاکستانی کارکنوں کیلئے روزگار کے مواقع اور سعودی عرب میں پاکستانی برادری کی فلاح و بہبود سمیت دو طرفہ تعاون کے تمام شعبوں پر مشاورت کرینگے۔   جبکہ فریقین باہمی مفاد کے علاقائی اور عالمی امور پر بھی تبادلہ خیال کریں گے۔  دورے کے دوران دو طرفہ معاہدوں اور مفاہمت کی متعدد یادداشتوں پر دستخط متوقع ہیں۔

ترجمان دفتر خارجہ کے مطابق وزیر اعظم اسلامی تعاون تنظیم کے سیکرٹری جنرل ڈاکٹر یوسف العثیمین ،ورلڈ مسلم لیگ کے سیکرٹری جنرل محمد بن عبد الکریم العیسیٰ ،مکہ مکرمہ اورمدینہ منورہ میں حرمین شریفین کے امام صاحبان سے بھی ملاقاتیں کرینگے۔اس ملاقات میں اسلام و فوبیا اور عالم اسلام کو در پیش دیگر مسائل پر بھی بات چیت ہوگی۔

سعودی ولی  عہد محمد بن سلمان اور سعودی رہنماوَں  سے ملاقات کے بعد  وزیر ِ اعظم عمران خان عمرے کے لئے جائیں گے اور  مدینہ منورہ میں روزہ   رسول ﷺ  پر حاضری دیں گے۔ ترجمانِ دفترِ خارجہ کے مطابق وزیراعظم  جدہ میں پاکستانی برادری سے بھی ملاقات کرینگے۔