وزارت قانون نے صدر مملکت کو چیف الیکشن کمشنر کے خط پر قانونی رائے دے دی

وزارت قانون نے صدر مملکت ڈاکٹر عارف علوی کو چیف الیکشن کمشنر کے خط پر قانونی رائے دے دی، ملک بھر میں عام انتخابات کی تاریخ پر وزارت قانون وانصاف نے صدر مملکت کو رائے پر مبنی جوابی خط میں کہا ہے کہ انتخابات کی تاریخ دینے کا اختیار الیکشن کمیشن کے پاس ہے۔

الیکشن کمیشن کی جانب سے انتخابی شیڈول پر مشاورت سے انکار کے بعد ایوانِ صدر نے وزارت قانون سے رائے مانگی تھی، جس پر وزارت قانون وانصاف نے صدر کو رائے پر مبنی جوابی خط ارسال کردیا ہے۔ وزارت قانون و انصاف نے اپنے خط میں لکھا ہے کہ ملک بھر میں عام انتخابات کی تاریخ دینے کا اختیار الیکشن کمیشن کے پاس ہے۔ وزارت قانون و انصاف نے خط میں واضح کیا ہے کہ انتخابات کی تاریخ دینےکی مجازاتھارٹی الیکشن کمیشن ہی ہے۔

24 اگست کو صدر مملکت ڈاکٹرعارف علوی نے جنرل الیکشن کی تاریخ کا فیصلہ کرنے کیلئے چیف الیکشن کمشنر سکندر سلطان راجہ کو ایک خط کے ذریعے مُلاقات کی دعوت دی تھی۔ جس پر الیکشن کمیشن نے اجلاس طلب کیا تھا۔ اجلاس میں فیصلہ ہوا کہ چیف الیکشن کمشنر عام انتخابات کی تاریخ پر صدر مملکت عارف علوی سے ملاقات نہیں کریں گے۔

الیکشن کمیشن کے انکار کے بعد 25 اگست کو ایوانِ صدر نے وزارت قانون سے رائے مانگی تھی۔ ایوانِ صدر نے معاملے پر وزارت قانون کی رائے لینے کیلئے خط سیکرٹری وزارت قانون کو ارسال کیا۔