لاہور ہائیکورٹ نے پی ٹی آئی کے صدر پرویز الہٰی کو رہا کرنے کا حکم دے دیا

لاہور: لاہور ہائی کورٹ نے پاکستان تحریک انصاف (پی ٹی آئی) کے صدر چوہدری پرویز الٰہی کی رہائی کا حکم دے دیا۔

تفصیلات کے مطابق لاہور ہائیکورٹ نے الٰہی کی گرفتاری کے خلاف درخواست کی سماعت کی جس میں قومی احتساب بیورو (نیب) حکام نے سابق وزیراعلیٰ پنجاب کو عدالت میں پیش کیا۔

پی ٹی آئی صدر نے نیب کی جانب سے اپنی گرفتاری کو عدالت میں چیلنج کیا تھا اور جسٹس امجد رفیق نے ڈائریکٹر جنرل (ڈی جی) نیب سے پرویز الٰہی کے پیش نہ ہونے پر وارنٹ جاری کرنے کا کہا تھا۔

جمعہ کو عدالت نے پرویز الٰہی کی درخواست پر فیصلہ سناتے ہوئے ان کی رہائی کا حکم دیا۔

عدالت میں سماعت کے دوران جسٹس امجد رفیق نے استفسار کیا کہ احتساب عدالت کو بتایا گیا ہے کہ انٹرا کورٹ اپیل خارج کر دی گئی ہے۔ اس پر نیب پراسیکیوٹر نے کہا کہ یہ میرے علم میں نہیں ہے۔

نیب پراسیکیوٹر کے جواب پر جسٹس امجد نے کہا کہ 'مکمل انکوائری ہوگی، میں اب پرویز الٰہی کو فوری رہا کرنے کا حکم دے رہا ہوں'۔