شوگر مافیا کی چاندی،چینی نے ڈبل سنچری کر لی

ملک میں چینی کی بڑھتی قیمتیں رکنے کا نام نہیں لے رہیں، کوئٹہ میں چینی220 روپے فی کلو ہوگئی جبکہ ایک ہفتے کےدوران کوئٹہ میں چینی کی فی کلو قیمت میں 35 روپے کا اضافہ ہو چکا ہے۔ پشاور میں بھی چینی کی قیمتوں میں غیر معمولی اضافہ دیکھا گیا، پشاور کی عام مارکیٹوں میں 100 روپے فی کلو ملنے والی چینی اب 200 روپے میں فروخت ہونے لگی ہے۔

فیصل آباد میں بھی چینی 200 روپے کلو تک فروخت ہونے لگی۔ چینی کی بلیک مارکیٹنگ میں بھی قانو نہیں پایا جا سکا۔

پی ڈی ایم حکومت نے چینی کی برآمد کی اجازت دی تھی لیکن نگران حکومت نے چینی کی برآمد پر پابندی لگادی ہے۔

سابق وزیر خزانہ اسحاق ڈار نے ملک میں چینی کے وافر ذخائر ہونے کا دعویٰ کیا ہے اور چینی کی قیمت میں اضافے کی وجہ ناقص گورننس اور  بے ایمان کاروباری طریقوں کو قرار دیا ہے۔

دوسری جانب مہنگائی کی چکی میں پسنے والے عوام بے بس ہیں اور ان کا کہنا ہے کہ دو وقت کی روٹی تو دور  کی بات اب ایک وقت کا کھانا بھی دشوار ہوگیا ہے۔

ادھر لاہور میں 20 کلو آٹے کا تھیلا 2800 کا ہو گیا ہے  جبکہ ماش کی دال 600 روپے تک جا پہنچی ہے۔  اسلام آباد کے اتوار بازار میں بھی اشیائے خورد و نوش کی زیادہ قیمتوں نے غریب عوام کے ہوش اڑا دیے ہیں۔