توانائی بچت پر مناسب عملدرآمد کا منصوبہ جلدسامنے لائینگے، نگران وزیراعظم

اسلام آباد: نگران وزیراعظم انوار الحق کاکڑ نے کہا ہے کہ حکومت کی خزانہ اور توانائی کی ٹیمیں بجلی بلوں کے مسئلے کے قابل عمل اورپائیدار حل کی تلاش کیلئے دن رات کام کر رہی ہیں۔

ایک نجی ٹی وی چینل کو خصوصی انٹرویو دیتے ہوئے انہوں نے کہا کہ اِس سلسلے میں توانائی کی بچت پر مناسب عملدرآمدکا منصوبہ جلد سامنے لایا جائے گا۔نگران وزیراعظم نے کہاکہ ملک کے اقتصادی اورسماجی ڈھانچے کی بہتری کے لئے بھی کوششیں جاری ہیں جن سے متوسط اورپسماندہ طبقے کو فائدہ پہنچے گا۔

انوارالحق کاکڑ نے نگران وزیراعظم کے طورپراپنے طویل عرصہ تک کام کرنے کے تاثر کو قطعی طورپر مسترد کرتے ہوئے کہاکہ وہ کبھی ملکی قانون کی خلاف ورزی نہیں کریںگے۔ملک میں آزادعدلیہ کی اہمیت کو اجاگر کرتے ہوئے انہوں نے کہا کہ حکومت انتخابات کے انعقاد کے بارے میں اعلیٰ عدلیہ کے فیصلے پرمکمل عملدرآمدکرے گی اوراس سلسلے میں الیکشن کمیشن کی معاونت بھی کرے گی۔

دہشتگردی کے خلاف حکومتی پالیسی کی وضاحت کرتے ہوئے نگران وزیراعظم نے کہا کہ ریاست کے پاس کالعدم تنظیموں سے نمٹنے کے لئے مذاکرات اور طاقت دونوں طریقے موجود ہیں۔