نگران وزیر اطلاعات سے ایرانی سفیر کی ملاقات، تعلقات اور میڈیا کے شعبہ میں تعاون کو فروغ دینے پر اتفاق

اسلام آباد: پاکستان اور ایران نے منگل کے روز دونوں ممالک کے درمیان اقتصادی، تجارتی، ثقافتی، سیاحت اور عوامی رابطوں سمیت مختلف شعبوں میں دوطرفہ تعاون کو مضبوط اور وسعت دینے پر اتفاق کیا ہے۔ 

یہ معاہدہ  اسلام آباد میں نگراں وزیر اطلاعات مرتضیٰ سولنگی اور ایرانی سفیر رضا امیری موغدام کے درمیان ہونے والی ملاقات میں طے پایا۔انہوں نے باہمی دلچسپی کے امور، دونوں ممالک کے درمیان برادرانہ تعلقات، میڈیا کے شعبے میں تعاون کے فروغ پر تبادلہ خیال کیا۔

اس موقع پر نگراں وزیر اطلاعات مرتضیٰ سولنگی نے پاکستان اور ایران کے درمیان اقتصادی تعلقات کو مزید بڑھانے پر زور دیا۔

انہوں نے کہا کہ پاکستان ایران کے ساتھ اپنے برادرانہ تعلقات کو بہت اہمیت دیتا ہے ۔

مرتضیٰ سولنگی نے کہا کہ پاکستان اور ایران گہرے مذہبی، ثقافتی اور لسانی رشتوں میں بندھے ہوئے ہیں۔

نگران وفاقی وزیر نے کہا کہ میڈیا کے شعبے میں پاک ایران تعاون وقت کی ضرورت ہے۔ انہوں نے کہا کہ پاکستان ایران کے ساتھ فلم اور ڈرامہ کے شعبوں میں تعاون کو فروغ دینے کا بھی خواہاں ہے۔

سفیر نے کہا کہ ایرانی برصغیر کے عظیم شاعر علامہ اقبال کو بڑی قدر کی نگاہ سے دیکھتے ہیں۔ اس موقع پر وفاقی وزیر نے کہا کہ پاکستان ایران کے ساتھ مل کر علامہ اقبال پر فلم بنائے گا۔