توشہ خانہ کیس میں بشریٰ بی بی کی ضمانت میں توسیع

اسلام آباد: اسلام آباد کی ڈسٹرکٹ اینڈ سیشن عدالت نے جمعرات کو توشہ خانہ کیس میں پاکستان تحریک انصاف (پی ٹی آئی) کے چیئرمین عمران خان کی اہلیہ بشریٰ بی بی کی عبوری ضمانت میں 12 ستمبر تک توسیع کردی۔

تفصیلات کے مطابق بشریٰ بی بی کے خلاف توشہ خانہ جعلی رسیدوں سے متعلق کیس کی سماعت ڈسٹرکٹ اینڈ سیشن کورٹ اسلام آباد میں ہوئی جس دوران وہ اپنے وکلا کے ہمراہ جج طاہر عباس سپرا کی عدالت میں پیش ہوئیں۔

کیس کے تفتیشی افسر نے عدالت کو بتایا کہ فیڈرل انویسٹی گیشن ایئرپورٹ (ایف آئی اے) نے بشریٰ بی بی کی آڈیو فرانزک کے لیے بھیج دی ہے اور تحقیقات کے لیے بشریٰ بی بی کی گرفتاری ضروری ہے۔

وکیل سلمان صفدر نے کہا کہ بشریٰ بی بی سے تین گھنٹے تک جرح کی گئی۔

جج طاہر عباس نے استفسار کیا کہ معاملہ رسیدوں کا ہے، آڈیو کہاں سے آئی؟ جس پر تفتیشی افسر نے کہا کہ میں نے عمران خان کی اہلیہ سے آڈیو لیک سے متعلق پوچھا کہ یہ ان کی ہے یا نہیں۔ بشریٰ بی بی نے کہا کہ میں نے ایسا کوئی غلط کام نہیں کیا اور لیک ہونے والی آڈیو ان کی نہیں ہے۔

تفتیشی افسر نے استدعا کی کہ بشریٰ بی بی کی وائس میچنگ کے لیے وقت دیا جائے۔

عدالت نے تفتیشی افسر کی درخواست منظور کرتے ہوئے سماعت ملتوی کرتے ہوئے بشریٰ بی بی کی عبوری ضمانت میں 12 ستمبر تک توسیع کردی۔