پاک بھارت میچ آج پھر بارش سے متاثر ہونے کا امکان

کولمبو: پاکستان اور بھارت کے درمیان کھیلے جانے والے ایشیا کپ 2023 کے سپر فور کا میچ آج (پیر) پھر بارش سے متاثر ہونے کا خدشہ ہے کیونکہ کولمبو میں کرکٹ کے لیے حالات سازگار نہیں ہیں۔

کولمبو میں رات گئے سے بوندا باندی ہو رہی ہے اور تیز ہواؤں کے ساتھ ابر آلود ہے، آج دن بھر وقفے وقفے سے بارش کی پیش گوئی کی گئی ہے، دوپہر کے اوقات میں مزید موسلادھار بارش متوقع ہے۔

واضح رہے کہ کولمبو میں جاری اس میچ میں پاکستان نے کل (اتوار) ٹاس جیت کر بھارت کو پہلے بیٹنگ کی دعوت دی تھی۔

کل بارش کی وجہ سے کل صرف 24.1 اوورز کا کھیل ہوا جس میں بھارت نے 2 وکٹوں کے نقصان پر 147 رنز بنائے۔

ایشیا کپ کے سپر فور مرحلے میں پاکستان اور بھارت کے درمیان ہونے والا اہم میچ مسلسل بارش اور گراؤنڈ فیلڈ کو نقصان پہنچنے کے باعث ملتوی کر کے ریزرو ڈے یعنی آج کے دن میں منتقل کر دیا گیا۔

جواریوں نے آج میچ میں بارش ہوگی یا نہیں اس پر بھی بڑی رقم لگا رکھی ہے۔

آج کھیل دوپہر 2:30 بجے وہیں سے شروع ہوگا جہاں سے گزشتہ روز ختم ہوا تھا۔