چین : سیلاب دوران درجنوں مگرمچھ افزائش کے فارم سے بھاگ گئے

گوانگ ڈونگ: چینی حکام نے تصدیق کی ہے کہ سمندری طوفان ہائی کوئی کی وجہ سے آنے والے شدید سیلاب کے باعث چین میں ایک بریڈنگ فارم سے درجنوں مگرمچھ آزاد ہونے میں کامیاب ہو گئے۔

غیر ملکی میڈیا رپورٹس میں بتایا گیا ہے کہ چینی حکام نے کل 75 مگرمچھوں کے افزائش کے فارم سے فرار ہونے کی اطلاع دی ہے۔

یہ فرار چینی صوبے گوانگ ڈونگ میں سمندری طوفان کی وجہ سے جاری سیلاب کی وجہ سے ماومنگ جھیل کے بہہ جانے کے نتیجے میں ہوا ہے۔

فرار ہونے والے مگرمچھوں میں سے کچھ کو کامیابی سے پکڑ لیا گیا ہے، باقی آٹھ مگرمچھوں کی تلاش جاری ہے جو تاحال لاپتہ ہیں۔

اس غیر معمولی صورتحال کے جواب میں، چینی حکام نے جھیل کے آس پاس کے رہائشیوں کو ایڈوائزری جاری کی ہے، جس میں ان پر زور دیا گیا ہے کہ وہ گھر کے اندر رہیں جب تک کہ بالکل ضروری نہ ہو اور اس مشکل وقت میں احتیاط برتیں۔