خیبرپختونخواہ،ضلعی انتظامیہ کی چینی زخیرہ اندوزی کے خلاف کریک ڈاؤن

خیبر پختونخوا کے مختلف اضلاع میں چینی کی ذخیرہ اندوزی کے خلاف کریک ڈائون کے دوران چینی کی ہزاروں بوری برآمد کر لی گئی۔ڈپٹی کمشنر صوابی گوہر علی کی ہدایت پر ضلعی انتظامیہ صوابی نے چینی کی ذخیرہ اندوزی کے خلاف کارروائیاں کرتے ہوئے شیوہ اڈہ میں مختلف مارکیٹوں اور گوداموں سے چینی کی 2 ہزار بوریاں قبضہ میں لے لیں اور 3 افراد کو گرفتار کر کے ان کے گودام سیل کر دیئے گئے۔

ایڈیشنل اسسٹنٹ کمشنر چھوٹا لاہور 1صبیحہ نے مارکیٹوں میں چینی کا سٹاک اور اشیاءخوردونوش کی قیمتیں چیک کیں۔اسی طرح ڈپٹی کمشنر کوہاٹ ڈاکٹر عظمت کی ہدایت پر اسسٹنٹ کمشنر کوہاٹ عثمان اشرف نے محکمہ خوراک کے اسسٹنٹ فوڈ کنٹرولر گلاب گل اور ڈسٹرکٹ ایڈمنسٹریٹر افغان مہاجرین کے ہمراہ چینی کی ذخیرہ اندوزی کی شکایات پر چھاپے مارے جس کے نتیجے میں 6 ٹن سے زیادہ چینی برآمد کر لی گئی۔

ایڈیشنل اسسٹنٹ کمشنر نورنگ گوہر علی نے نورنگ بازار میں مختلف گوداموں پر چھاپے مار کر ہزاروں بوری چینی برآمد کرلی اور متعدد گوداموں کو سیل کر کے ملوث افراد کے خلاف مقدمات درج کر دیئے ہیں۔