ایران میں قید 5 امریکی شہری صحت مند ہیں،ایرانی صدر

ایران کے صدر ابراہیم رئیسی نے کہا ہے کہ ایرانی جیل میں قید 5امریکی شہریوں کی اگلے ہفتے کے اوائل میں امریکا میں قید 5 ایرانیوں کے بدلے میں رہائی کا امکان ہے۔ انہوں نے امریکی نشریاتی ادارے کو انٹرویو میں کہاکہ ہماری تازہ ترین معلومات کے مطابق ایران میں قید 5 امریکی شہری صحت مند ہیں۔

انہوں نےبتایا کہ ان قیدیوں کی آئندہ ہفتے رہائی کا امکا ن ہے۔ واضح رہے اگرایران ان پانچوں قیدیوں کو رہا کردیتا ہےتو اس سے امریکا اور ایران کے درمیان ایک بڑی کشیدگی دور ہو جائے گی۔معاہدے سے واقف 8ایرانی اور دیگر ذرائع کے مطابق قیدیوں کا تبادلہ اگلے ہفتے کے اوائل میں ممکن ہے۔

امریکی ٹیلی ویژن نیٹ ورک این بی سی کی جانب سے انٹرویو کے جاری کردہ اقتباسات کے مطابق ایرا نی صدرنے بتایا کہ انتظامات مکمل کر لیے گئے ہیں اور قیدیوں کے تبادلے کی حتمی کارروائی کو مقررہ وقت میں حتمی شکل دی جائے گی

ایران اور امریکا کے درمیان قیدیوں کے تبادلے کا معاہدہ پہلی بار 10 اگست کو منظر عام پر آیا تھا۔اس کے بدلے امریکا نے جنوبی کوریا سے 6 ارب ڈالر کی ایرانی رقوم کی قطری کھاتوں میں منتقلی سے اتفاق کیا تھا لیکن اس رقم کو صرف انسانی ہمدردی کی اشیاء کی خریداری پر خرچ کیا جا سکتا ہے

ایرانی صدر کا کہنا تھا کہ ایران فیصلہ کرے گا کہ یہ رقم کس طرح خرچ کی جائے گی۔ یہ رقم ایرانی عوام اور ایرانی حکومت کی ہے، لہٰذا اسلامی جمہوریہ ایران ہی فیصلہ کرے گا کہ اس رقم کا کیا کرنا ہے۔

جب ان سے یہ سوال کیا گیا کہ کیا یہ رقم انسانی ضروریات کے علاوہ دیگر مقاصد کے لیے بھی استعمال کی جائے گی؟ تو ابراہیم رئیسی نے کہا انسانی ہمدردی کا مطلب وہ ہے جو ایرانی عوام کی ضرورت ہے، لہٰذا اس رقم کو ان ضروریات کے لیے مختص کیا جائے گا اور ایرانی عوام کی ضروریات کا فیصلہ اور تعیّن خود ایرانی حکومت کرے گی۔