سمگلنگ،غیرقانونی تجارت میں ملوث افراد کیخلاف سخت کارروائی ہوگی،وزیراعظم

اسلام آباد: نگران وزیراعظم انوارالحق کاکڑ نے حکومت کے اس عزم کااظہارکیاہے کہ سمگلنگ اور غیرقانونی تجارت میں ملوث تما م افراد کے خلاف سخت کارروائی کی جائے گی۔

نجی ٹیلی ویژن کے ایک پروگرام میں اظہارخیال کرتے ہوئے انہوں نے کہاکہ وفاقی اور صوبائی سطح پر سمگلنگ اورغیرقانونی تجارتی سرگرمیوں میں ملوث سرکاری عہدیداروں اور سیاسی شخصیات کی نشاندہی کرلی گئی ہے۔ وزیراعظم نے کہا کہ متعلقہ حکام ان کے خلاف شواہد جمع کررہے ہیں جو عدالت میں پیش کئے جائیںگے اور انہیں سزادلائی جائے گی۔

انہوں نے کہاکہ ایرانی تیل کی سمگلنگ میں متعددبیوروکریٹ اور سیاسی شخصیات ملوث ہیں۔ڈالر کی غیرقانونی تجارت کے بارے میں ایک سوال پرانوارالحق کاکڑ نے کہاکہ سخت اقدامات اورقوانین کے نفاذ کے ذریعے غیرقانونی لین دین روک دیاگیاہے۔انہوں نے اس امیدکااظہارکیاکہ پاکستانی روپیہ کی قدر مزیدمستحکم ہوگی۔ملک میں انتخابات کے انعقادکے بارے میں وزیراعظم نے کہاکہ انتخابات آئندہ سال جنوری کے وسط یااختتام تک ہوسکتے ہیں۔تاہم انہوں نے کہاکہ اس بارے میں فیصلے کااختیار الیکشن کمیشن کوحاصل ہے۔