ترک صدر نے اسرائیل کو دہشتگرد ریاست قرار دیدیا

غیر ملکی خبر ایجنسی کے مطابق  ترک صدر رجب طیب اردوان نے اسرائیل کو دہشتگرد ریاست قرار دیدیا۔ترک صدر رجب طیب اردوان نے کہا ہے کہ  ہم مسجدالاقصیٰ اور مقبوضہ   بیت المقدس میں ہونیوالے مظالم کی فوری روک تھام چاہتے ہیں ۔استنبول اور انقرہ میں شہریوں نے  اسرائیلی مظالم کیخلاف  احتجاج بھی کیا۔

دوسری جانب  اسرائیلی فورسز کا فلسطینیوں کیخلاف طاقت کا جارحانہ استعمال،اردن نے اسرائیل کو تنبیہ کردی ہے۔ اسرائیل نمازیوں اور متنازع علاقے میں  عرب شہریوں  کو حقوق دینے والے بین الاقوامی قوانین  کا احترام کرے۔

مقبوضہ بیت المقدس میں صیہونی فورسز کے مظالم جاری ہیں ۔مسلسل دوسری رات صیہونی فورسز اور فلسطینیوں کےدرمیان جھڑپیں،زخمیوں کی تعداد 90ہوگئی ہے۔

یاد رہے اسرائیلی پولیس کی جانب سے جمعہ کر روز مسجد اقصیٰ میں موجود نمازیوں کو عبادات سے روکا گیا، جس پر احاطہ میدان جنگ میں بدل گیا اور جھڑپوں میں 170 سے زائد فلسطینی زخمی ہو گئے تھے۔ جس پر فلسطینی مظاہرین نے پولیس پر پتھراؤ اور بوتلیں پھینک کر جوابی کارروائی کی تھی۔

ماحول میں بد مزگی پھیلی تھی جب رمضان المبارک کے آخری جمعہ کے روز نماز جمعہ کے دوران اسرائیلی پولیس کی جانب سے مسجد اقصیٰ کے احاطے میں شدید فائرنگ اور شیلنگ کی گئی۔قابض اسرائیلی فوج نے مسجد اقصی میں مسلمانوں کے داخلے پر پابندی لگائی جس کے بعد مسلمانوں نے احتجاج کیا اور مسجد میں داخل ہو گئے اور نماز ادا کی تھی۔

وزیر اعظم عمران خان کی جانب سے سماجی رابطوں کی ویب سائٹ ٹویٹر پر پیغام جاری کیا گیا تھا جس میں وزیر اعظم نےفلسطین میں جاری اسرائیلی جارحیت کی شدید مذمت کی تھی ، وزیر اعظم عمران خان کا کہنا تھا کہ اسرائیل کی جانب سے مسجد اقصیٰ میں نمازیوں  پر حملہ کیا گیا جو انسانی اقدار  اور عالمی قوانین کی کھلم کھلا خلاف ورزی ہے ۔

وزیر اعظم عمران خان نے کہا فلسطینی عوام  کو اپنی حمایت کا یقین دلاتے ہیں ، عالمی برادری فلسطینیوں کو جائز حقوق دلانے میں فوری کردار ادا کرے۔