چین سے کورونا ویکسین کی ایک اور کھیپ پاکستان پہنچ گئی

تفصیلات کے مطابق  : پاکستان انٹرنیشنل ائیرلائنز (پی آئی اے) کا خصوصی طیارہ مزید دس لاکھ ویکسین لے کر پاکستان پہنچ گیا ہے۔سینوویک ساخت کی ویکسین حکومت پاکستان اور وزارت صحت کی ایما پر خصوصی طیارہ سے لائی گئیں ہیں ۔

ملک میں کرونا کی شدت میں اضافے کے باعث ویکسین درآمد تیز کردی گئی ہے۔اس سے قبل پی آئی اے کی چھ خصوصی پروازیں لاکھوں ویکسین پاکستان لے کر پہنچیں ہیں۔ویکسین چین سے پرواز نمبر پی کے 6852 کے ذریعے آئی ہیں جو 4 بجے اسلام آباد پہنچیں۔

گزشتہ روز  ترجمان ‏وزارت صحت کے مطابق کورونا کی برطانوی ویکسین ایسٹرا زینیکا کی پہلی کھیپ پاکستان پہنچ گئی تھی ۔ویکسین کی پہلی کھیپ میں 12 لاکھ 48 ہزار 400 خوراکیں شامل ہیں، ایسٹرا زینیکا ویکسین کی پہلی کھیپ کوویکس سہولت کے تحت لائی گئی ہے، قطر ایئر لائن کے ذریعے پاکستان کو عطیہ کی گئی ویکسین اسلام آباد ایئر پورٹ پہنچائی گئی تھی۔

جاپان نے پاکستان کو، کورونا وائرس کی ایک لاکھ تیس ہزار تشخیصی کٹس فراہم کی تھیں۔ٹوکیو میں پاکستان کے سفارتخانے نے باضابطہ طور پر جاپان کی ایک حفظانِ صحت کی کمپنی سے تیزی سے تشخیص کرنے والی کٹس وصول کیں تھیں۔

گزشتہ روز نیشنل کمانڈ اینڈ آپریشن سینٹر (این سی او سی) نے اب تک موصول ہونے والی کورونا ویکسین کی تفصیلات جاری کی تھیں۔ این سی او سی کے مطابق اب تک ایک کروڑ 19 لاکھ ویکسین کی خوراکیں موصول ہوچکی ہیں اور موصول ہونے والی ویکسین میں سائنو فارم، سائنو ویک اور کینسائنو شامل ہیں۔

این سی او سی کا کہنا تھا کہ  10لاکھ سائنوویک ویکسین کی خوراکیں کل پاکستان پہنچیں گی جبکہ 10 لاکھ مزید ویکسین 13 اور 15 مئی کو پاکستان پہنچیں گی۔15 لاکھ مزید ویکسین رواں ماہ کے آخر تک پہنچنے کا امکان ہے۔