کینیڈا نے ہندوستان کی ٹریول ایڈوائزری کو مسترد کر دیا

اوٹاوا: کینیڈا نے ہندوستانی حکومت کی جانب سے کینیڈا میں مقیم اپنے شہریوں کے لیے جاری کردہ ٹریول ایڈوائزری کو مسترد کر دیا ہے۔

تفصیلات کے مطابق کینیڈا کی پبلک سیفٹی منسٹری نے بھارت کی جانب سے ٹریول ایڈوائزری جاری کرنے کے بعد ردعمل دیتے ہوئے کہا کہ کینیڈا تمام لوگوں کے لیے محفوظ ملک ہے۔

خیال رہے کہ کینیڈا میں سکھ رہنما ہردیپ سنگھ کے قتل کے بعد بھارت اور کینیڈا کے درمیان کشیدگی کے بعد بھارت نے اپنے شہریوں کے لیے ایڈوائزری جاری کی تھی۔

بھارتی میڈیا کے مطابق وزارت خارجہ کی جانب سے جاری ایڈوائزری میں کہا گیا ہے کہ بھارتیوں کو کینیڈا میں بڑھتی ہوئی بھارت مخالف سرگرمیوں سے محتاط رہنے کا مشورہ دیا گیا ہے۔

میڈیا رپورٹس میں مزید کہا گیا ہے کہ ایڈوائزری میں کینیڈا جانے والے ہندوستانیوں کو بھی وہاں محتاط رہنے کو کہا گیا ہے۔

بھارتی وزارت خارجہ نے کہا کہ کینیڈا میں بھارت مخالف ایجنڈے کی مخالفت کرنے پر سفارت کاروں کو نشانہ بنایا گیا، اس لیے بھارتی شہریوں کو کینیڈا کے مخصوص علاقوں کا سفر کرنے سے گریز کرنا چاہیے۔