خالصتان موومنٹ کا ایک اور سکھ رہنما کینیڈا میں قتل

اوٹاوا: بھارت سے علیحدہ وطن کا مطالبہ کرنے والی آزاد خالصتان تحریک کے ایک اور سکھ رہنما سکھ ڈول سنگھ (سکھ دونیکے) کو کینیڈا میں قتل کر دیا گیا ہے۔

تین دن قبل کینیڈین وزیر اعظم جسٹن ٹروڈو نے ایک بیان میں کہا تھا کہ ’’کینیڈا میں قتل ہونے والے سکھ رہنما ہردیپ سنگھ نگار کے قتل میں ہندوستان کی بدنام زمانہ خفیہ ایجنسی ’را‘ کے ملوث ہونے کے ناقابل تردید ثبوت موجود ہیں۔

اس بیان کے فوراً بعد کینیڈا نے بھارتی ایجنسی ’را‘ کے سربراہ کو ملک بدر کر دیا جب کہ بھارت نے کینیڈا کے الزام کو مسترد کرتے ہوئے سینیئر کینیڈین سفارت کار کو جوابی کارروائی میں ملک چھوڑنے کا حکم دیا۔

اب اطلاعات ہیں کہ کینیڈا میں خالصتان موومنٹ کے ایک اور سرگرم رہنما سکھ ڈول سنگھ کو بھی نامعلوم افراد نے گولی مار کر ہلاک کر دیا ہے۔

میڈیا رپورٹس کے مطابق 2017 میں بھارت سے کینیڈا منتقل ہونے والے سکھ ڈول سنگھ کو کینیڈا کے شہر ونی پیگ میں نامعلوم افراد نے فائرنگ کر کے قتل کر دیا۔

دوسری جانب بھارتی میڈیا کا کہنا ہے کہ سکھ ڈال سنگھ بھارت کو مطلوب خالصہ رہنماؤں کی فہرست میں شامل تھا جو بھارتی پنجاب پولیس کے افسران کی ملی بھگت سے کینیڈا فرار ہوا تھا اور سکھ رہنما ارشدیپ سنگھ (ارشا ڈالا) کا قریبی ساتھی تھا۔ .