سیشن کورٹ اسلام آباد میں غیر شرعی نکاح کیس کی سماعت

ڈسٹرکٹ اینڈ سیشن کورٹ نے غیر شرعی نکاح کیس میں آئندہ سماعت پر عمران خان کو پیش کرنے کا حکم دیتےہوئے سماعت 2اکتوبرتک ملتوی کردی۔

اسلام آباد کی مقامی عدالت میں چیئرمین پی ٹی آئی، بشریٰ بی بی کیخلاف غیرشرعی نکاح کیس کی سماعت  ہوئی،سول جج قدرت اللہ نے کیس کی سماعت کی

سپرنٹنڈنٹ اٹک جیل کا خط سول جج قدرت اللہ کی عدالت میں موصول ہو گیا،اٹک جیل سپرنٹنڈنٹ نے چیئرمین پی ٹی آئی کو عدالت پیش کرنے سے معذرت ظاہر کردی۔ خط میں کہا گیا ہے کہ چیئرمین پی ٹی آئی کو سکیورٹی وجوہات کے باعث عدالت پیش نہیں کر سکتے۔

سول جج قدرت اللہ کی عدالت میں چئیرمین پی ٹی آئی کےوکیل شیر افضل مروت پیش ہوئے

وکیل شیر افضل مروت نے استدعا کی کہ غیرشرعی نکاح کیس کی سماعت آج بغیر کارروائی ملتوی کردیں،چیئرمین پی ٹی آئی کو جیل سےعدالت پیش کرنے کے دوبارہ احکامات جاری کیے جائیں۔

انہوں نے کہا کہ چیئرمین پی ٹی آئی کا معاملہ اب اٹک جیل کا نہیں بلکہ اڈیالہ جیل کا ہے،اسلام آباد ہائیکورٹ نے چیئرمین پی ٹی آئی کو اڈیالہ جیل منتقل کرنے کا حکم دیا ہے۔

شیر افضل مروت نے کہا کہ چیئرمین پی ٹی آئی اس وقت ریاست کی کسٹڈی میں ہیں۔عدالت نے 2 اکتوبر کو چیئرمین پی ٹی آئی کو عدالت پیش کرنے کا دوبارہ حکم دےدیا ہے اور کیس کی سماعت 2 اکتوبر تک ملتوی کر دی۔