روس کی عدالت نے اپوزیشن لیڈر کو ساڑھے تین سال قید سنا دی

غیر ملکی خبر رساں ادارے کے مطابق  اپوزیشن لیڈر الیکسی ناوالنی کو پیرول شرائط کی خلاف ورزی پر قید کی سزا سنائی گئی،  ناوالنی کو سنائی گئی قید کی سزا میں سے نظربندی کا عرصہ منہا کیا جائے گا۔ اپوزیشن لیڈر ناوالنی کو جرمنی میں علاج کے بعد واپسی پر روس کے بارڈر سے گرفتار کیا گیا تھا۔

سزا سنائے جانے کے فوری بعد الیکسی ناوالنی کے ساتھیوں نے حامیوں کو احتجاج کی کال دے دی۔وکلاء صفائی کا کہنا ہے کہ  ناوالنی کو سنائی گئی سزا کے خلاف اپیل دائر کی جائے گی۔

واضح رہے کہ روسی اپوزیشن لیڈر کو 17جنوری کو برلن سے واپس ماسکو پہنچنے پر ائیرپورٹ پر ہی گرفتار کرلیاگیاتھا۔

31جنوری کو روسی اپوزیشن لیڈر الیکسی کےحامی منفی 42ڈگری سینٹی گریڈ میں بھی سڑکوں پر نکل آئے تھے،احتجاجی ریلیاں نکالیں، الیکسی نوالنی کی اہلیہ نے بھی احتجاجی ریلی  میں شرکت کی۔

پولیس کا روسی اپوزیشن لیڈر کے حامیوں کیخلاف کریک ڈاؤن،سینکڑوں افراد کو گرفتار کرلیا گیا تھا،مظاہرین الیکسی نوالنی کی رہائی اور صدرپیوٹن سےمستعفی ہونے کا مطالبہ کرتے رہے۔مظاہرین کا کہنا تھا کہ  آزاد ملک میں رہنے کی خواہش گرفتاری کے خوف سے زیادہ مضبوط ہے۔