پاک امریکہ تعلقات کو اعلیٰ سطح پر لے کر جانا اولین ترجیح ہے ، مسعود خان

امریکہ میں پاکستان کے سفیر مسعود خان نے کہا کہ پاک امریکہ تعلقات کو مزید مستحکم کرنا اور انہیں اعلی سطح پر لے جانا اولین ترجیح ہے۔

ا ن خیالات کااظہار مسعود خان نے واشنگٹن ڈی سی میں امریکہ کے فارن سروس انسٹی ٹیوٹ میں اردو زبان اور پاکستانی ثقافت کی تربیت حاصل کرنے والے امریکی فارن سروس کے افسران سے خطاب کرتے ہوئے کیا۔

مسعود خان نے اپنے خطاب میں کہا کہ علاقائی استحکام اور مضبوط اقتصادی شراکت داری کے ذریعے سماجی و اقتصادی ترقی دونوں ممالک کی بنیادی ترجیح ہے۔

سفیر پاکستان نے کہا کہ دونوں ممالک اپنے اقتصادی تعلقات کو مضبوط کرنے اور غیر سیکیورٹی شعبوں میں اپنے تعلقات کو مزید مستحکم کرنے کے لئے کوشاں ہیں۔

انہوں نے پاکستان میں تعینات ہونے والے امریکی سفارت کاروں پر زور دیا کہ وہ اپنی سفارتی صلاحیتوں اور مہارت کو عوامی روابط استوار کرنے اور دونوں ممالک کے درمیان مضبوط اقتصادی شراکت داری کو فروغ دینے کے لئے برے کار لائیں۔

سفیر پاکستان نے امریکی سفارتکاروں سے اردو میں خطاب کرتے ہوئے کہا کہ دونوں ممالک دہائیوں پر محیط اپنے تعلقات میں ہمیشہ ایک دوسرے کے شانہ بشانہ کھڑے رہے ہیں اب آپ اس رشتے کو آگے بڑھانے میں اپنا کردار ادا کریں گے۔ آپ کی کوششیں دونوں ممالک خصوصا پاکستان اور امریکہ کے عوام کو ایک دوسرے کے قریب لائیں گی۔

انہوں نے زور دیا کہ نامزد سفارتکار عوامی سفارتکاری کے ذریعے دونوں ممالک کے حوالے سے باہمی غلط فہمیوں اور بدگمانیوں کو دور کرنے کے لیے اپنا کردار بھرپور طریقے سے ادا کریں۔

مسعود خان نے کہا کہ تعلیمی تعاون دوطرفہ تعلقات کا ایک اہم جزو ہے جس نے ہمارے لوگوں کے درمیان مضبوط بندھن پیدا کیا اور پاکستان کے نوجوانوں کو دونوں ممالک کی سماجی و اقتصادی ترقی میں کردار ادا کرنے میں مدد کی۔

مسعود خان نے39000 پر مشتمل امریکی تعلیمی اداروں سے فارغ التحصیل پاکستانی طلبا کے ایک مضبوط نیٹ ورک کے اہم کردار پر روشنی ڈالتے ہوئے کہا کہ ہمارا ہدف ہر سال ایک ہزار پاکستانی طلبا کو امریکہ لانا ہے تاکہ وہ اعلی تعلیم میں امریکی مہارت سے مستفید ہو سکیں۔

اس موقع پر شمال مشرقی ایشیائی زبانوں کی نگران محترمہ تبسم سہیل نے سفیر پاکستان کو اردو زبان اور ثقافت کے کورس کے بارے میں بریفنگ دی جو نامزد امریکی سفارت کاروں کے لیے لازمی ہے۔

قبل ازیں سفیر پاکستان کی فارن سروس انسٹی ٹیوٹ کی ڈائریکٹر ایمبیسیڈر جوآن پولاسچک ملا قات ہوئی جنہوں نے سفیر پاکستان کو سفارتکاروں کے لئے مختلف تربیتی پروگراموں کے حوالے سے آگاہ کیا ۔