حکومت نے غیر قانونی تارکین وطن کے خلاف کریک ڈاون تیز کردیا

خیبرپختونخوا حکومت نے غیر قانونی تارکین وطن کے خلاف کریک ڈاون تیز کرنے کا فیصلہ کرلیا ہے۔سرکاری حکام کے مطابق صوبے بھر میں مجموعی طور پر 9 لاکھ 56 ہزار 720 افغان مقیم ہیں، بندوبستی اضلاع میں 2 لاکھ 85 ہزار 608 جب کہ 22 ہزار 39 افغان قبائلی اضلاع میں موجود ہیں۔

رپورٹ میں بتایا گیا ہے کہ خیبر پختونخوا میں مقیم 6 لاکھ 48 ہزار 968 افغان مہاجرین کے پاس رجسٹریشن کارڈ موجود ہے جب کہ 105 افغان مہاجرین مساجد میں پیش امام ہیں۔رپورٹ کے مطابق 3 ہزار 911 افغان مہاجرین کو مختلف جرائم میں گرفتار کیا گیا ،جب کہ 597 افغان نے غیر قانونی طور پر پاکستان کی قومی شناخت کارڈ بنانے کی بھی تصدیق کی جنہیں فوری منسوخ کرنے کی ہدایت جاری کردی گئی،رواں سال 1 لاکھ 16 ہزار 418 افغان کو ویزے جاری کئے گئے ہیں تاہم افغان مہاجرین کے کاروبار اور جائیداد سے متعلق کوئی مستند معلومات موجود نہیں ہے۔

یو این ایچ سی آرکے مطابق پاکستان میں 21 لاکھ 80 ہزار افغان مہاجرین قانونی طور پر رہائش پذیر ہیں اور 07-2006 کی مردم شماری کے مطابق اس میں 13 لاکھ افراد شامل ہیں جن کے پاس رجسٹریشن کارڈز کا ثبوت ‘پی او آر’موجود ہے جبکہ 2017 کی رجسٹریشن کے بعد مزید 8 لاکھ 80 ہزار کو افغان سٹیزن کارڈز جاری کیے گئے ۔یو این ایچ سی آر’کے مطابق افغانستان میں اگست 2021 میں افغان طالبان کے اقتدار سنبھالنے کے بعد سے تقریبا 6 لاکھ سے 8 لاکھ افغان شہری پاکستان آئے، ان میں سے کچھ کے پاس درست ویزے تھے، جو اب ختم ہو چکے ہیں۔

سرکاری حکام کے مطابق افغان شہریوں کو واپس بھیجنے کا طویل عرصے سے ایجنڈا ہے، خاص طور پر دسمبر 2014 میں نیشنل ایکشن پلان بنے کے بعد، منصوبے بنائے گئے اور حکمت عملی مرتب کی گئی، تاہم انسانی اور مالی وسائل کے ساتھ قابل عمل لاجسٹک منصوبہ تیار کرنے کے لیے کوئی سنجیدہ کوشش نہیں کی گئی۔