اڈیالہ جیل میں چیئرمین پی ٹی آئی کے سیل کی توسیع کردی گئی

اڈیالہ جیل میں قید چیئرمین پی ٹی آئی کے سیل میں توسیع کردی گئی۔

ذرائع کے مطابق خصوصی عدالت کے جج ابوالحسنات ذوالقرنین کے احکامات پر جیل سپرنٹنڈنٹ نے عملدرآمد کرتے ہوئے چیئرمین پی ٹی آئی کے سیل میں  35 فٹ سے تقریباً 60 فٹ تک توسیع کر دی۔

ذرائع نے بتایا کہ چیئرمین پی ٹی آئی نے دورانِ سماعت جج سے گھرکے کھانے اور ورزش کیلئے سائیکل فراہم کرنے کی مزید 2 درخواستیں کیں۔

دوران سماعت جج نے چیئرمین پی ٹی آئی سے مکالمہ کرتے ہوئے کہا کہ جیل میں کھانا فراہم کرنے کی ذمہ داری جیل حکام کی ہے۔ جج نے سپرنٹنڈنٹ جیل کو ورزش کیلئے مینوئل کے تحت سائیکل فراہم کرنے کے احکامات بھی جاری کئے۔

عدالتی ذرائع کے مطابق 23 اکتوبر کو ہر صورت میں فرد جرم عائد کی جائے گی جبکہ پی ٹی آئی کے وکلاء نے خدشات کا اظہار کرتے ہوئے کہا کہ اسے 23 اکتوبر سے بھی آگے لے جایا جائے گا۔