ڈی جی خان میں مسافر بس کو حادثہ، 4 افراد جاں بحق، 25 زخمی

ڈی جی خان: ڈیرہ غازی خان میں انڈس ہائی وے پر کوٹ چھٹہ کے قریب مسافر بس کو خوفناک حادثہ پیش آیا جس کے نتیجے میں 4 افراد جاں بحق جب کہ 25 زخمی ہوگئے۔

واقعہ کی اطلاع ملتے ہی ریسکیو ٹیم اور پولیس حکام موقع پر پہنچ گئے۔

ریسکیو حکام کے مطابق چنگچی رکشہ کو گرنے سے بچاتے ہوئے مسافر بس الٹ گئی جس کے نتیجے میں 4 افراد جاں بحق اور 25 زخمی ہوگئے۔

جائے وقوعہ پر امدادی کارروائیاں جاری ہیں جب کہ زخمیوں کو قریبی اسپتالوں میں منتقل کردیا گیا ہے۔

حکام کے مطابق حادثے میں زخمی ہونے والے 6 افراد کی حالت تشویشناک ہے۔ حادثے کا شکار ہونے والی بس راجن پور سے ڈی جی خان جا رہی تھی۔

تاہم پولیس نے واقعے کی تحقیقات شروع کرنے کے لیے علاقے کو گھیرے میں لے لیا ہے۔