نگران حکومت کا پاکستان تحریک انصاف کی قیادت سے رابطہ

نگران حکومت کی طرف سے پاکستان تحریک انصاف کی قیادت سے رابطہ کیا گیا، نگران وزیرِاطلاعات مرتضیٰ سولنگی کی خواہش پر سینئر مرکزی رہنما پاکستان تحریک انصاف شفقت محمود کی اپنی رہائشگاہ پر ان سے ملاقات کی۔

ملاقات میں صاف شفاف انتخابات کے انعقاد، سیاسی جماعتوں کیلئے انتخابات میں شرکت کے مساوی مواقع کے اہتمام اور وسیع قومی مفاہمت سمیت باہمی دلچسپی کے امور پر گفتگو کی گئی۔ اس کے ساتھ قومی سطح پر ہم آہنگی اور مفاہمت کے فروغ کے امکانات، اہمیت اور ضرورت پر بھی تبادلۂ خیال کیا گیا

ملاقات کے بعد شفقت محمود کی جانب سے جاری بیان میں کہا گیا کہ انتخابات کی افادیت ان کے آزادانہ، منصفانہ، غیرجانبدارانہ اور شفاف انعقاد کی مرہونِ منت ہے، آزادانہ، منصفانہ، غیرجانبدارانہ اور شفاف انتخابات کیلئے تمام جماعتوں کو انتخابات میں حصہ لینے کے یکساں ماحول اور مساوی مواقع کی فراہمی کو بنیادی حیثیت حاصل ہے۔

نگران حکومت کا پاکستان تحریک انصاف کی قیادت سے رابطہ

نگران وزیرِاطلاعات مرتضیٰ سولنگی کی خواہش پر سینئر مرکزی رہنما پاکستان تحریک انصاف شفقت محمود کی اپنی رہائشگاہ پر ان سے ملاقات

ملک میں صاف شفاف انتخابات کے انعقاد، سیاسی جماعتوں کیلئے انتخابات میں شرکت کے مساوی مواقع کے…

— PTI (@PTIofficial) October 17, 2023

شفقت محمود نے کہا کہ پاکستان تحریک انصاف کو بلاشبہ برابری کی سطح پر سیاسی سرگرمیوں کے مواقع نہیں مل رہے، تحریک انصاف کو آئین و قانون کی روشنی میں انتخابی مہم چلانے کی بھی اجازت نہیں، جبکہ دیگر جماعتوں کو ملک بھر میں جلسے جلوسوں کی کھلی آزادی ہے۔

انہوں نے لکھا کہ نہایت ناہموار ماحول میں منعقد کروائے گئے خلافِ قاعدہ انتخابات عوامی سطح پر ساکھ اور قبولیت سے محروم رہیں گے، فیئر ٹرائل اور انصاف تک مکمل رسائی کو بھی آزادانہ و منصفانہ انتخابات کے ہدف کے حصول میں بنیادی اہمیت حاصل ہے۔

شفقت محمود کے مطابق قومی سطح پر مفاہمت کے فروغ کا گہرا انحصار دستور کی بالادستی اور جمہوریت کے بقاء و تسلسل پر ہے اور یہ قومی مفاہمت تحریک انصاف کی شمولیت کے بغیرممکن نہیں۔

ان کا کہنا تھا کہ پاکستان تحریک انصاف دستور کے سائے میں انتخابات کے صاف شفاف انعقاد کیلئے ہر ممکن تعاون کیلئے تیار ہے۔