سال2025بھی فلم انڈسٹری کی بحالی کا خواب ہی ثابت ہوا،پروڈیوسرز اور اداکار بھی خاصے مایوس دکھائی دئیے

ویب ڈیسک: سال2025بھیپاکستانی فلم انڈسٹری کی بحالی کا خواب ہی ثابت ہوا، اس سال معمول سے زیادہ فلمیں ریلیز ہوئیں لیکن چند کے علاوہ کوئی بھی فلم خاطر خواہ بزنس نہ کر سکی۔

تفصیلات کے مطابق رواں سال تیرہ سے زائدپاکستانی فلمیں ریلیز ہوئیں ان میں اردو  اور پنجابی فلمیں شامل ہیں جبکہ چند پشتو فلمیں بھی سینما گھروں کی زینت بنیں لیکن دیکھنے والوں نے چند فلموں کے علاوہ باقی کسی میں بھی زیادہ دلچسپی ظاہر نہیں کی۔

سال دوہزار پچیس میں ’لو گرو‘،’ باپ‘،’دیمک ‘،’نیلوفر‘،’ مارشل آرٹس‘،’ کبیر‘،’ قلفی‘،  ’لمبی جدائی‘،’ تیری میری کہانیاں‘،’ عشق لاہور‘،  ’اینا نوں رہنا سہنا نہیں آئندا‘، ’ویلکم ٹو پنجاب اور دیگر ریلیز ہوئیں، جن میں سے ’لو گرو‘،’ دیمک‘،’ عشق لاہور‘ اور’ مارشل آرٹس‘ کو دیکھنے والوں نے کسی حد تک پسند بھی کیا ۔

اس حوالےسےفلم انڈسٹری سے جڑی شخصیات نے کہا کہ اب فلم بینوں کا ذہن تبدیل ہو چکا ہے وہ روایتی کہانیوں سے تنگ آگئے دور جدید کے ساتھ ٹیکنالوجی اور مضبوط اسکرپٹ بہت ضروری ہے۔

سال دو ہزار پچیس میں خطیر سرمائے سے فلمیں بنانیوالے ڈائریکٹر پروڈیوسرز بھی مایوس دکھائی دئیے انہوں نے بھی انڈسٹری کی بحالی کو مشکل قرار دیدیا، فلم انڈسٹری کیلئے حکومت کی جانب سے فنڈز کا بھی اعلان کیا گیا لیکن وہ بھی دعووں تک ہی محدود رہا، فلم ساز، پروڈیوسرز  اور اداکار بھی خاصے مایوس دکھائی دئیے۔

دوسری جانب ہالی وڈ کی فلموں نے بھی خوب بزنس کیا اور دیکھنے والوں کو اپنی جانب متوجہ کیا جبکہ پنجاب حکومت کی جانب سے اعلان کردہ فلم فنڈز بھی اہل افراد کو نہ مل سکے۔