صدرمملکت اور وزیراعظم کی کرسمس کے پُر مسرت موقع پر مسیحی بہنوں بھائیوں کو مبارکباد

اسلام آباد: صدرِ مملکت آصف علی زرداری اور وزیراعظم محمد شہباز شریف نے کرسمس کے پُرمسرت موقع پر مسیحی برادری کو مبارک باد دیتے ہوئے کہا ہے کہ کرسمس محبت، امن، بھائی چارے، اتحاد اور امید کا پیغام دیتا ہے، جو قومی یکجہتی اور باہمی احترام کے فروغ کے لیے نہایت اہم ہے۔

تفصیلات کے مطابق ایوان صدر کی جا نب سے جاری پیغام میں صدر مملکت آصف علی زرداری نے کرسمس کے پرمسرت موقع پر اپنے پیغام میں کہا ہےکہ کرسمس انسانیت کے لیے ایک آفاقی پیغام لاتی ہے ۔کرسمس محبت، سخاوت، رحم، اتحاد اور امید کی ترغیب دلاتی ہے۔

بیان میں صدر مملکت نے مزید کہا کہ آئین ِپاکستان تمام شہریوں کو بنیادی حقوق کی ضمانت دیتا ہے۔ انہوں نے کہاکہ قومی یکجہتی اور ترقی کے لیے تمام شہریوں کے حقوق کی پاسداری ناگزیر ہے۔مسیحی برادری نے تعلیم، صحت ،سماجی بہبود، عوامی خدمت کے شعبے میں نمایاں خدمات انجام دیں۔

وزیراعظم شہباز شریف نے کرسمس کے موقع پر مسیحی بہنوں بھائیوں کو مبارک باد پیش کی ہے ۔اپنے پیغام میں انہوں نے کہاکہ کرسمس تمام انسانیت کے لیے امن، بھائی چارے اور محبت کا پیغام ہے۔

بیان میںانہوں نے کہاکہ ملکی ترقی وخوشحالی خاص طور پر تعلیم، صحت اور قوم کی تعمیر کے شعبوں میں مسیحی برادری کا کردار مثالی ہے۔انہوں نے کہاکہ حکومت تمام مذہبی برادریوں کے حقوق کے تحفظ اور احترام کو فروغ دینے کے لیے پرعزم ہے۔