کسی بھی اقلیتی شہری سے ناانصافی یا زیادتی ہوئی تو قانون پوری قوت سے حرکت میں آئے گا،وزیراعظم

اسلام آباد:وزیراعظم شہباز شریف نے کہا ہے کہ کسی بھی اقلیتی شخص سے ناانصافی یا زیادتی پر قانون پوری قوت سے حرکت میں آئے گا، اقلیتوں کے ساتھ کسی صورت زیادتی نہیں ہونے دیں گے۔

تفصیلات کے مطابق وزیر اعظم ہاؤس میں کرسمس کی تقریب سے خطاب کرتے ہوئے وزیراعظم شہباز شریف نے کہا کہ حضرت عیسیٰ علیہ السلام کا یوم ولادت منانے کیلئے آج اکٹھے ہوئے ہیں، حضرت عیسیٰ علیہ السلام انسانیت کیلئے محبت، بردباری اور خدمت کا پیغام لائے۔

خصوصی تقریب سے خطا ب کرتے ہوئے وزیر اعظم نے کہا کہ ملکی ترقی میں اقلیتی برادری کا قابل قدر اور تاریخی کردار ہے، قیام پاکستان سے آج تک اقلیتی برادری نے ملکی ترقی کیلئے اہم کردار ادا کیا ہے۔

دوران خطاب وزیر اعظم نے کہا کہ پاکستان میں ہر شہری کو اپنے مذہب پر عمل کی اجازت ہے، کسی کو من مانی کرنے کی اجازت نہیں دی جائے گی۔

وزیراعظم نے کہا کہ اسلام نے ہمیشہ مساوات، عدل، انصاف اور برابری کا سبق دیا، دکھی انسانیت کے سکھ کا ذیعہ بننا چاہیے، اس موقع پر وزیراعظم نے وطن پر جان نچھاور کرنے والے مسیحی بھائیوں کو خراج عقیدت پیش کیا۔

انہوں نے کہا کہ کسی اقلیتی شہری سے ناانصافی یا زیادتی ہوئی تو قانون پوری قوت سے حرکت میں آئے گا، اقلیتوں سے زیادتی کرنے والے ہر ہاتھ کو روکا جائے گا، یقین دلاتا ہوں آپ کی ترقی اور خوشحالی کے سفر میں ساتھ دیں گے، اقلیتوں کے حقوق کے تحفظ کیلئے پوری طرح کھڑے ہیں، کسی کو یہ اجازت نہیں دیں گے کہ وہ اقلیتوں سے ناانصافی کرے۔

تقریب سے خطاب میں وزیراعظم کا کہنا تھا کہ دکھی انسانیت کے سکھ کا ذریعہ بننا چاہیے، وطن پر لہو نچھاورکرنے والے مسیحی بھائیوں کو خراج عقیدت پیش کرتا ہوں، ہارون ولیم نے دشمن سے لڑتے ہوئے جان کا نذرانہ پیش کیا، میں نے فیلڈمارشل سید عاصم منیر کے ساتھ ہارون ولیم کے جنازے میں شرکت کی۔

ان کا مزید کہنا تھا کہ قوم مسلح افواج میں مسیحی افسران اور جوانوں کی خدمات کو کبھی فراموش نہیں کر سکتی، پاکستان میں ہرشہری کو اپنے مذہب پر عمل کرنے کی مکمل آزادی حاصل ہے، مسجد، مندر، گرجاگھر یا گوردوارہ میں سب کو عبادات کی آزادی حاصل ہے۔

دوران تقریب معرکہ حق کے حوالے سے گفتگو کرتے ہوئےوزیراعظم شہباز شریف نے کہا کہ ہمارے شاہینوں نے بھارت کے 7 طیارے گرائے، مئی میں پاکستان نے فیلڈ مارشل سید عاصم منیر کی قیادت میں دشمن کے چھکے چھڑا دیے۔

وزیر اعظم نے کہا کہ فیلڈ مارشل سید عاصم منیر کی قیادت میں معرکہ حق میں تاریخی کامیابی ملی، ائیر چیف ظہیر احمد بابر سدھو کی قیادت میں بھارت کے 7 طیارے گرائے گئے۔

وزیراعظم کا کہنا تھا کہ نواز شریف نے ہمیشہ اقلیتوں کے حقوق کی پاسداری کی، آج میرے لیڈر میاں نواز شریف کی بھی سالگرہ ہے، یقین دلاتا ہوں کہ آپ کی ترقی اور خوشحالی کے سفر میں ساتھ دیں گے۔

بعدازاں وزیراعظم شہبازشریف نے مسیحی برادری کے ساتھ کرسمس کا کیک بھی کاٹا، تقریب میں وفاقی وزراء، اراکین پارلیمنٹ اور غیرملکی سفارتکار بھی شریک ہوئے۔