آسام: مودی حکومت کی پالیسیوں کے خلاف پر تشدد مظاہرے، کئی افراد ہلاک ، متعدد زخمی

گوہاٹی :بھارت کی شمال مشرقی ریاست آسام میں مودی حکومت کی پالیسیوں کے خلاف پرتشدد مظاہروں میں کئی افراد ہلاک اور متعدد زخمی ہوگئے۔

بھارتی میڈیا رپورٹس کے مطابق آسام کےقبائلی اضلاع کاربی انگ لانگ اور کھیرونی میں زمین کے تنازع پر پُرتشدد مظاہرے جاری ہیں،مظاہرین نے دکانوں اور بی جے پی رہنما کے گھر کو آگ لگا دی، پولیس پر بھی شدید پتھراؤ کیا۔

جس کے جواب میں پولیس نے مظاہرین کو منتشر کرنے کے لیے آنسوگیس کی شیلنگ اور لاٹھی چارج کیا۔

میڈیا رپورٹس کے مطابق پولیس اور مظاہرین کے درمیان جھڑپوں میں 2 افراد ہلاک جبکہ 40 پولیس اہلکاروں سمیت 50 سے زائد افراد زخمی ہو گئے۔

دوسری جانب حالات قابو میں کرنے کے لیے مودی حکومت کی جانب سےعلاقے میں کرفیو نافذ کردیا گیا، انٹرنیٹ سروسز بھی معطل کردی گئیں۔

علاوہ ازاںآسام کے وزیراعلیٰ نے علاقے میں حالات قابو  میں کرنے کے لیے اضافی نفری تعینات کرنے کا حکم دیدیا۔

خیال رہے کہ آسام میں مختلف علاقوں سے آئے غیر مقامی آبادکاروں نے زمینوں پر قبضہ جمالیا ہے جس سے آسام کے مقامی قبائل کے معاشی وسائل اور آبادیاتی توازن کو شدید خطرات لاحق ہیں، آسام کے قبائلیوں نے زرعی اورکاروباری زمینوں سے غیر مقامی افراد کو نکالنے اورحکومت سے اپنی آبائی زمینوں کے تحفظ کا مطالبہ کیا ہے۔