ویمنز بگ بیش لیگ کا نواں ایڈیشن (کل) سے آسٹریلیا میں شروع ہوگا

میلبورن: کرکٹ آسٹریلیا (سی اے )کے زیر اہتمام ویمنز بگ بیش لیگ کا نواں ایڈیشن (کل)جمعرات سے آسٹریلیا میں شروع ہوگا۔

ٹورنامنٹ میں 8 ٹیمیں ٹائٹل کے حصول کے لئے پنجہ آزمائی کریں گی جن میں ایڈیلیڈ سٹرائیکرز، برسبین ہیٹ،ہوبارٹ ہریکنز ،میلبورن رینیگڈز، میلبورن سٹارز، پرتھ سکارچرز، سڈنی سکسرز اور سڈنی تھنڈر شامل ہیں۔ٹورنامنٹ میں ایڈیلیڈ سٹرائیکرزکی ٹیم ٹائٹل کا دفاع کرے گی۔

ٹورنامنٹ ڈبل رائونڈ روبن اور ناک آئوٹ فائنلز کی بنیاد پر کھیلا جائے گا۔ ٹورنامنٹ 19 اکتوبر سے شروع ہوکر 2 دسمبر کو اختتام پذیر ہوگا۔2023-24 کے سیزن میں پہلی بار خواتین کی بگ بیش لیگ کے لیے 3 ستمبر 2023 کو پلیئرز ڈرافٹ کا انعقاد کیا گیا تھا۔ٹورنامنٹ کا ابتدائی میچ میلبورن سٹارز اور سڈنی سکسرز کی ٹیموں کے درمیا ن نارتھ سڈنی اوول، سڈنی میں کھیلا جائے گا۔لیگ میں فائنل سمیت 59 میچز ہوں گے ۔

ڈبلیو بی بی ایل کے نویں ایڈیشن میں شامل 8 ٹیموں کے درمیان 56 لیگ میچز کھیلے جائیں گے جس کے بعد ناک آئوٹ مرحلے میں ایک میچ ایلیمینٹراور ایک میچ چیلنجر اور ایک فائنل کھیلا جائے گا۔