اسلامک یونیورسٹی اسلام آباد میں سپورٹس گا لا2023 کا آغاز

انٹرنیشنل اسلامک یونیورسٹی اسلام آباد کے سپورٹس گالا 2023 ء کا بدھ کو آغاز ہو گیا ۔ افتتاحی تقریب کے موقع پر صدر آئی آئی یو آئی ڈاکٹر نے ھذال حمود العتیبی مہمان خصوصی تھے۔

افتتاحی تقریب میں طلباء نے میل کیمپس کے ہارڈ بال کرکٹ گرائونڈ میں رنگا رنگ فلیگ مارچ کا مظاہرہ کیا۔ کھیلوں کے مقابلوں میں یونیورسٹی میں زیر تعلیم 30 سے ​​زائد ممالک کے طلباء حصہ لے رہے ہیں۔ کھیلوں کے یہ مقابلے 25 اکتوبر تک جاری رہیں گے، ان کھیلوں میں ٹگ آف وار، ٹیبل ٹینس، بیڈمنٹن، والی بال، باسکٹ بال، کرکٹ، فٹ بال، ہاکی، شطرنج اور ایتھلیٹکس کے مقابلے شامل ہیں۔

صدر بین الاقوامی اسلامی یونیورسٹی نے اس موقع پر کہا کہ معاشرے کو صحت مند رکھنے کے لیے کھیل ضروری ہیں۔ انہوں نے ڈائریکٹوریٹ آف سٹوڈنٹس افیئرز کی کاوشوں کو سراہتے ہوئے مزید کہا کہ بین الاقوامی رینکنگ میں شاندار کامیابی کے بعد اب اس سپورٹس گالا نے یونیورسٹی کی حقیقی بین الاقوامی تصویر پیش کی ہے۔

انہوں نے کہا کہ نوجوانوں کو مطالعے، کھیلوں اور ہم نصابی سرگرمیوں میں یکساں طور پر شامل کرکے تعلیمی اہداف حاصل کیے جاسکتے ہیں۔ افتتاحی تقریب میں یونیورسٹی کے نائب صدور، ڈینز، ڈی جیز، سٹوڈنٹ ایڈوائزرز مرد، انچارج خواتین کیمپس، سٹوڈنٹس ایڈوائزر خواتین، سینئر فیکلٹی ممبران اور طلباء کی بڑی تعداد نے بھی شرکت کی۔