ہم فلسطین اور غزہ کے ساتھ کھڑے ہیں:وزیراعظم

تفصیلات کے مطابق وزیر اعظم عمران خان نے سماجی رابطے کی ویب سائٹ ٹوئٹر پر فلسطینیوں سے اظہار یکجہتی کرتے ہوئے لکھا کہ " میں وزیراعظم پاکستان ہوں اور ہم غزہ کے ساتھ کھڑے ہیں،  ہم فلسطین کے ساتھ کھڑے ہیں۔

وزیراعظم عمران خان نے اپنے پیغام میں   عالمی شہرت یافتہ  امریکی ماہر لسانیات، فلسفی، مؤرخ اور سیاسی مصنف نوم چومسکی کا  قول بھی  شیئر کیا ہے جو غزہ کے مظلوموں کے لیے لکھا گیا تھا۔ اس قول  میں چومسکی نے کہاکہ   ’تم میرا پانی لے لو، میرے زیتون کے درخت جلا دو، میرا گھر تباہ کرو، میرا کام چوری کرو، میرے والد کو قید کرو، میری ماں کو قتل کردو، میرے ملک پر بمباری کرو، ہم سب کو بھوکا رکھو ، ہم سب کو ذلیل کرو لیکن اگر میں اس کے بدلے ایک راکٹ گِرا دوں تو میں قصووار ہوں۔‘

I am PM of Pakistan and #WeStandWithGaza #WeStandWithPalestine pic.twitter.com/0Gpb9DxjJG

— Imran Khan (@ImranKhanPTI) May 12, 2021

واضح رہے کہ غزہ پر اسرائیل کی وحشیانہ بمباری سے اب تک جاں بحق فلسطینیوں کی تعداد 36 ہوگئی ہے، 13 بچے اور مزاحمتی تنظیموں کے کئی رہنما بھی شہداء میں شامل ہیں، وحشیانہ بمباری میں  بمباری میں فلسطینیوں کے گھر ملبے کا ڈھیر بن گئے جبکہ  عورتیں اور بچے پناہ کی تلاش میں غزہ کی گلیوں میں دوڑتے رہے۔  حماس کی جانب سے بھی جواب میں راکٹ برسائے گئے جس کے نتیجے میں اشکیلون میں تیل کی پائپ لائن میں آگ لگ گئی، بس تباہ، تین اسرائیلی ہلاک جبکہ 70 زخمی ہوگئے۔

دوسری جانب اقوام متحدہ کے سیکرٹری جنرل نے اسرائیل کی جانب سے رہائشی علاقوں پر حملے پر اظہار تشویش کیا ہے۔ ایمنسٹی انٹرنیشنل نے اسرائیل سے غیر قانونی طاقت کا استعمال فوری روکنے کا مطالبہ کیا ہے۔ عرب لیگ کے سربراہ نے غزہ پراسرائیلی حملے کی مذمت کی ہے۔عرب لیگ  نے اسرائیل کو غزہ میں "بلا اشتعال اور غیر ذمہ دارانہ" حملوں کاذمہ دارٹھہرایا۔