زرمبادلہ کے سرکاری ذخائر میں 6 کروڑ 30 لاکھ ڈالر اضافہ، انٹربینک میں امریکی ڈالر 31 پیسے سستا

کراچی: گزشتہ ہفتے کے دوران زرمبادلہ کے سرکاری ذخائر میں اضافہ ریکارڈ کیا گیا، انٹربینک میں امریکی ڈالر 31 پیسے مزید سستا ہوگیا۔

سٹیٹ بینک کی جانب سے جاری کردہ ہفتہ وار اعدادوشمار کے مطابق 13 اکتوبر کو ختم ہونے والے ہفتے کے دوران 6 کروڑ 30 لاکھ ڈالر کے اضافے سے زرمبادلہ کے سرکاری ذخائر کی مالیت 7 ارب 71 کروڑ 40 لاکھ ڈالر ہوگئی۔

مرکزی بینک کے مطابق ایک ہفتے کے دوران کمرشل بینکوں کے ذخائر 18 کروڑ 45 لاکھ ڈالر کمی سے 5 ارب 19 کروڑ 98 لاکھ ڈالر کی سطح پر آگئے۔

انٹربینک میں امریکی ڈالر 31 پیسے سستا ہوکر 278.50 روپے کا ہو گیا ہے۔

گزشتہ روز امریکی ڈالر کی قیمت میں 1 روپے 48 پیسے کی کمی آئی تھی۔جس کے بعد ڈالر کا ریٹ  280.29 روپے سے 278.81 روپے پر آگیا تھا۔

واضح رہے کہ پاکستان میں امریکی ڈالر کی قیمت انٹربینک میں 307 روپے اور اوپن مارکیٹ میں 330 روپے سے تجاوز کرگئی تھی۔ انٹربینک میں ڈالر 5 ہفتے میں مجموعی طور پر 30 روپے 30 پیسے سستا ہوچکا ہے۔