پی ٹی آئی کا فوجی عدالتوں میں ٹرائل کے معاملے کی سماعت کیلئے بنچ کی تشکیل کا خیر مقدم

پاکستان تحریک انصاف نے شہریوں کے فوجی عدالتوں میں ٹرائل کے معاملے کی سماعت کیلئے سپریم کورٹ کے بنچ کی تشکیل کا خیرمقدم کیا ہے۔

پاکستان تحریک انصاف کے ترجمان نے کہا کہ سول آبادی کے فوجی عدالتوں میں ٹرائلز کی دنیا کے کسی مہذب جمہوری معاشرے میں کوئی گنجائش ہے اور نہ ہمارا دستور اس کی اجازت دیتا ہے، اٹارنی جنرل کی عدالتِ عظمیٰ کو 3 اگست 2023 کو کروائی گئی یقین دہانی اور عدالتی ہدایات بھی ریاست کو ایسے ٹرائلز سے دوٹوک انداز میں منع کرتی ہے۔

شہریوں کے فوجی عدالتوں میں ٹرائل کے معاملے کی سماعت کیلئے سپریم کورٹ کے بنچ کی تشکیل کا معاملہ

پاکستان تحریک انصاف کی جانب سے فوجی عدالتوں میں ٹرائل کے معاملے کی سماعت کیلئے بنچ کی تشکیل کا خیرمقدم :

سول آبادی کے فوجی عدالتوں میں ٹرائلز کی دنیا کے کسی مہذب جمہوری معاشرے میں…

— PTI (@PTIofficial) October 20, 2023

ترجمان کا کہنا تھا کہ بدقسمتی سے دستور سے سنگین انحراف کی راہ پر گامزن ریاستی مشینری آئین، اٹارنی جنرل کی یقین دہانی اور سپریم کورٹ کی واضح ہدایات سے کھلے انحراف پر بضد رہتے ہوئے متعدد شہریوں کیخلاف فوجی عدالتوں میں کارروائی آگے بڑھا رہی ہے، ہمیں توقع ہے کہ جسٹس اعجاز الاحسن کی سربراہی میں اس معاملے کی سماعت کیلئے قائم بنچ فوری طور پر اس کا نوٹس لے گا اور ریاست کو دستور و قانون سے تجاوز سے روکا جائے گا۔

ترجمان نے امید کا اظہار کرتے ہوئے کہا کہ سپریم کورٹ اس معاملے پر دستور کی منشا کو بھی پہلے سے بڑھ کر واضح کرے گی اور اس باب میں اٹھائے جانے والے انتظامی و لیجسلیٹیو اقدامات کالعدم قرار دے کر منصفانہ سماعت کے دستوری حق کو پھر سے زندہ کرے گی۔