وزیراعظم دورہ چین مکمل کرنے کے بعد اسلام آباد پہنچ گئے

نگراں وزیراعظم انوار الحق کاکڑ چین کا دورہ مکمل کرکےاسلام آباد پہنچ گئے۔ دورے کے دوران وزیراعظم نے چین کے بیلٹ اینڈ روڈ منصوبے کے تیسرے فورم میں پاکستانی وفد کی قیادت کی۔جمعہ کو وزیراعظم آفس کے میڈیا ونگ سے جاری بیان کے مطابق دورے کے دوران وزیراعظم نے سیکرٹری جنرل اقوام متحدہ، چینی اور روسی صدور، چین کے وزیراعظم و کمیونسٹ پارٹی کے عہدیداران اور دیگر ممالک کے رہنماؤں سے ملاقاتیں کیں۔

وزیراعظم نے ملک میں سرمایہ کاری کے فروغ کیلئے چینی کارباری شخصیات اور سرمایہ کاروں سے بھی ملاقاتیں کیں،علاو ہ ازیں پاکستان اور چین نے فلسطین اور اسرائیل کے درمیان کشیدگی اور تشدد کی موجودہ بڑھتی ہوئی شدت پر گہری تشویش کا اظہار کرتے ہوئے فوری جنگ بندی کا مطالبہ کیا ہے۔

نگران وزیر اعظم انوار الحق کاکڑ کا 4 روزہ دورہ چین مکمل ہو گیا، جس کے بعد پاکستان اور چین کی جانب سے 31 نکاتی مشترکہ اعلامیہ جاری کر دیا گیا۔نگراں وزیراعظم انوار الحق کاکڑ کے دورہ چین کے اختتام پر جاری ہونے والے مشترکہ بیان میں دونوں فریقین نے اس بات کا اعادہ کیا کہ تنازعہ سے نکلنے کا بنیادی راستہ دو ریاستی حل اور فلسطین کی آزاد ریاست کے قیام میں مضمر ہے۔

مشترکہ بیان میں مخاصمت بند کرنے، شہریوں کے تحفظ اور غزہ میں مزید انسانی تباہی سے بچنے کے لیے ہرممکن کوشش کرنے کا مطالبہ کیا گیا ہے۔