پاکستان اور چین کا مین اسٹریم میڈیا کے درمیان تعاون کو مضبوط بنانے کا فیصلہ

اسلام آباد: پاکستان اور چین نے  اپنے مین اسٹریم میڈیا کے درمیان تعاون کو مضبوط بنانے کا فیصلہ کیا ہے۔

 وزیر اطلاعات و نشریات مرتضیٰ سولنگی اور چین کی پولیٹیکل کونسلر مس باؤ ژونگ کی قیادت میں چینی میڈیا کے وفد کے درمیان ملاقات بھی کی گئی ۔

چین پاکستان اقتصادی راہداری سے متعلق منصوبوں کو پی ٹی وی، ریڈیو پاکستان اور اے پی پی کے ذریعے اجاگر کرنے کا فیصلہ کیا گیا۔

مشترکہ رپورٹنگ اور میڈیا وفود کے تبادلے میں عملی تعاون کو مزید مضبوط کرنے پر اتفاق کیا گیا۔

اپنے ریمارکس میں وزیر اطلاعات نے کہا کہ پاکستان چینی صدر شی جن پنگ کے بیلٹ اینڈ روڈ اقدام کو قدر کی نگاہ سے دیکھتا ہے۔ انہوں نے کہا کہ بی آر آئی معاشی ترقی کے ذریعے امن اور خوشحالی لانے کا مظہر ہے۔

مرتضیٰ سولنگی نے CPEC کی مرکزیت اور دونوں ممالک کے درمیان دوستی کے بارے میں عوام میں آگاہی پیدا کرنے میں میڈیا کے اہم کردار پر زور دیا۔

وزیر اطلاعات نے کہا کہ پاکستان سی پیک کے اعلیٰ معیار کی ترقی کے نئے مرحلے میں چین کے ساتھ مختلف شعبوں میں تعلقات اور تعاون کو مضبوط بنائے گا۔

چینی سیاسی مشیر نے کہا کہ سی پیک کو محبت کی راہداری بنایا جائے گا۔ انہوں نے کہا کہ ان کا ملک میڈیا کے علاوہ آئی ٹی، زراعت اور صنعتی شعبے میں پاکستان کے ساتھ تعاون کو فروغ دے گا۔