پاکستان کشمیریوں کی ہر فورم پر حمایت جاری رکھے گا ،دفتر خارجہ

دفتر خارجہ کی ترجمان ممتاز زہرہ بلوچ نے کہا ہے کہ پاکستان کشمیریوں کو حق خودارادیت ملنے تک ان کی سیاسی ، سفارتی اور اخلاقی حمایت جاری رکھے گا۔

 انہوں نے آج اسلام آباد گفتگو کرتے ہوئے کہا کہ بھارت نے گزشتہ چھہتر سال سے مقبوضہ جموں و کشمیر پر غاصبانہ قبضہ کررکھا ہے۔

 ترجمان نے واضح طور پر کہا کہ پاکستان کا بچہ بچہ  حق خودارادیت کےلئے کشمیریوں کی منصفانہ اور قانونی جدوجہد کی حمایت کرتا ہے۔

بھارتی آئین کے آرٹیکل تین سوستر کی منسوخی اور پانچ اگست دوہزار انیس کے یکطرفہ اور غیر قانونی اقدامات سے متعلق ایک سوال کے جواب میں انہوں نے کہاکہ یہ کشمیر کےعوام کی آواز کو دبانے کی ایک کوشش ہے۔

 مقبوضہ جموں و کشمیر میں بھارت کے غیر قانونی اقدامات کو اجاگر کرتے ہوئے ممتاز زہرہ بلوچ نے کہا کہ کشمیریوں  کو ان کا حق رائے دہی دینے کی بجائے بھارت نے کشمیری قیادت کو پابند سلاسل کردیا ہے۔

 انہوں نے کہا کہ بھارت مقبوضہ جموں و کشمیر میں غیر کشمیری باشندوں کو آباد کررہا ہے جس کا مقصد کشمیریوں کی اکثریت کو اقلیت میں تبدیل کرنا ہے۔