پاکستان معاشی طور پر مضبوط ہو رہا ہے ،نگران وزیر خزانہ

وزیرخزانہ شمشاد اختر نے کہا ہے کہ حکومت معیشت کی بحالی کیلئے اہم اقدامات کررہی ہے۔

آج  کراچی میں صحافیوں سے گفتگو کرتے ہوئے انہوں نے کہا کہ دانشمندانہ اقتصادی پالیسیوں کی وجہ سے ملک کی معاشی صورتحال تیزی سے بہتر ہورہی ہے۔

انہوں نے کہا کہ صنعتی شعبے میں بہتری لانے کیلئے بھی اقدامات کئے جارہے ہیں۔

وزیرخزانہ نے کہا کہ حکومت سمگلروں کے خلاف بھی کارروائیاں کررہی ہے۔

وزیر خزانہ نے کہا کہ ایف بی آر نے رواں مالی سال کی پہلی سہ ماہی میں آئی ایم ایف کی جانب سے دیئے گئے ہدف سے زائد محصولات اکٹھے کئے جبکہ مزید محاصل اکٹھے کرنے کیلئے اقدامات جاری رہیں گے۔

انہوں نے کہا کہ سیلاب اور یوکرین جنگ کے باعث پاکستان سمیت ترقی پذیر ممالک کی معیشتیں متاثر ہوئیں تاہم نگران حکومت نے معیشت کی بحالی کے لئے سخت اقدامات کئے ہیں۔

انہوں نے کہا کہ حکومتی اقدامات کی بدولت معیشت کے تمام اشاریوں میں مثبت تبدیلی آئی ہے اور ترقی کی صورتحال بہتر ہوئی ہے۔

انہوں نے کہا کہ زرعی پیداوار بہتر ہو رہی ہے اور صنعتی سرگرمیاں بھی مستحکم ہونے کی امید ہے۔وزیر خزانہ نے کہا کہ زراعت اور خدمات کے شعبے ترقی کی شرح بڑھانے کی صلاحیت رکھتے ہیں اسی لئے زرعی شعبے کو ہرممکن سہولت فراہم کی جا رہی ہے۔

انہوں نے کہا کہ حکومت معیشت کے استحکام کے لئے پائیدار ترقی کی غرض سے نجی شعبے کو سہولت مہیا کر رہی ہے۔

اس موقع پر انہوں نے یقین دلایا کہ کاروباری اور تاجربرادری کے مسائل ترجیحی بنیادوں پر حل کئے جائینگے۔

انہوں نے کہا کہ سمگلنگ،ذخیرہ اندوزی اور غیرقانونی منتقلیوں کے خلاف اقدامات کے مثبت نتائج برآمد ہوئے ہیں جن سے مہنگائی قابو کرنے اور ڈالر کے مقابلے میں پاکستانی روپے کی قدر بہتر بنانے میں مدد ملی ہے۔

انہوں نے اس سلسلے میں سخت کارروائی کرنے پر قانون نافذ کرنیوالے اداروں کو سلام پیش کیا۔