پاک فوج کے شانہ بشانہ کھڑے ہیں،شیخ رشید

عوامی مسلم لیگ کے سربراہ اور سابق وفاقی وزیر داخلہ شیخ رشید نے کہا ہے کہ پاک فوج کے شانہ بشانہ کھڑے ہیں۔9 مئی کے واقعات کی مذمت کرتے ہوئے انہوں نے کہا کہ 9 مئی ایک گھٹیا پروگرام تھا،برے لوگوں کا کیا ہوا برا کام تھا۔ خدا کو گواہ بنا کر کہتا ہوں کہ ہمارے ساتھ کوئی زیادتی نہیں ہوئی۔

لال حویلی کو ڈی سیل کرنے کا حکم  کے بعد میڈیا سے گفتگو کرتے ہوئے شیخ رشید کا کہنا تھا کہ آئندہ الیکشن پی ڈی ایم کے خلاف لڑوں گا۔ اگر ہماری گرفتاری مطلوب ہے تو فون کرے میں آ جاؤں گا اور اگر جیل بھیجا گیا تو اندر سے قلم دوات کے نشان پر الیکشن لڑوں گا۔

انہوں نے سی پی او کو مخاطب کرتے ہوئے کہا کہ میں آپ کے پاس تھا، میں کوئی جن نہیں کہ ایک ہی وقت میں تین جگہ پر ہوتا۔ 40 روزہ چلے پر ضرور گیا تھا لیکن مجھے معلوم نہیں کہ کون کی جگہ تھی۔ 

شیخ رشید کا کہنا تھا کہ زندگی کے مشکل حالات میں سردار رزاق نے میرا کیس لڑا، آج اللہ نے مدد کی اور لال حویلی کو کھول دیا۔

سابق وزیر داخلہ کا کہنا تھا کہ معاملہ اللہ پر چھوڑتے ہیں ہم نسلی اور اصلی ہیں، عدالت نے لال حویلی کو ڈی سیل کرنے کی ہدایت کی ہے۔

انتخابات میں حصہ لینے کے حوالے سے ان کا کہنا تھا کہ راولپنڈی کی دونوں سیٹیں عوامی مسلم لیگ کی ہیں اور میں ہی دونوں سیٹوں پر الیکشن لڑوں گا۔ آئندہ الیکشن پی ڈی ایم کے خلاف لڑوں گا جب کہ میں جیل بھی گیا توبھی دونوں حلقوں سے الیکشن لڑوں گا۔