غزہ میں ہلاک ہونے والے بچوں کی تعداد دنیا کے اخلاقی ضمیر پر ایک داغ ہے، یو اے ای

متحدہ عرب امارات نے اقوامِ متحدہ کی سلامتی کونسل (یو این ایس سی) کے اجلاس میں غزہ میں فوری جنگ بندی کا مطالبہ کرتے ہوئے کہا ہے کہ غزہ میں ہلاک ہونے والے بچوں کی خطرناک تعداد دنیا کے اخلاقی ضمیر پر ایک داغ ہے۔

اقوامِ متحدہ میں متحدہ عرب امارات کی مستقل نمائندہ لانا نسیبہ نے کہا کہ فلسطینیوں کی جانیں مساوی تحفظ کی مستحق ہیں۔ غزہ میں گذشتہ تین ہفتوں کے دوران ہلاک ہونے والے فلسطینی بچوں کی تعداد گذشتہ چار سالوں میں عالمی سطح پر تنازعات میں ہلاک ہونے والے بچوں کی کل تعداد سے زیادہ ہے۔

انہوں نے غزہ میں ہلاک شدہ 3,457 بچوں کا حوالہ دیتے ہوئے کہا کہ اور کچھ نہیں تو اس سے ہمارے اخلاقی ضمیر کو ضرور داغدار ہونا چاہیے۔ ہمیں ابھی جنگ بندی کی ضرورت ہے۔

انہوں نے کہا طبلِ جنگ بج رہے ہیں اور اگر کونسل اسرائیل کو جنگ جاری رکھنے دے تو یہ اس کی سلامتی کے لیے خطرناک ہو سکتا ہے۔