چیئرمین پی ٹی آئی سے ان کے ذاتی معالج کی اڈیالہ جیل میں ملاقات

چیئرمین پاکستان تحریک انصاف عمران خان سے ان کے ذاتی معالج نے اڈیالہ جیل میں ملاقات کی جہاں انہوں نے ان کا طبی معائنہ کیا۔ ڈاکٹر فیصل سلطان کا کہنا تھا کہ وہ بالکل ہشاش اور صحت مند نظر آئے۔

ملاقات کے بعد صحافیوں سے گفت گو میں ڈاکٹر سلطان نے کہا کہ ہم نے ان سے صحت کے بارےمیں دریافت کیا جس پر انہوں نے اطمینان کا اظہار کیا۔ بظاہر عمران خان کو سلوپائزنگ دینے کی کوئی علامت نہیں، چیئرمین پی ٹی آئی نے بتایا وہ مکمل تندرست ہیں، انہوں نے کسی قسم کی کوئی شکایت نہیں کی وہ کم خوراک روٹین میں کھاتے ہیں، ان کا مزاج بالکل ٹھیک ہے اور وہ اپنی خوراک سے مطمئن ہیں۔

ڈاکٹر فیصل سلطان کی عمران خان سے ملاقات کے بعد اڈیالہ جیل کے باہر گفتگو#قوم_کا_حوصلہ_عمران_خان pic.twitter.com/Spjt6T1we9

— PTI (@PTIofficial) November 2, 2023

انہوں نے کہا کہ طبی معائنے میں ایسی کوئی بات محسوس نہیں ہوئی کہ جس سے اندازہ ہو کہ انھیں سلو پوائزن دیا گیا، شاید کسی موقع پر انھوں نے کسی خدشے کا اظہار کیا ہو تو شاید اسے غلط بیان کر دیا گیا ہو، ظاہری ملاحظہ میں ان کی صحت درست تھی اور سلو پوائزن کے حوالے سے کوئی ایسی علامات موجود نہیں تھی۔

ان کا کہنا تھا کہ چیئرمین پی ٹی آئی نے غذا کے بارے میں کوئی شکایت نہیں کی، وہ صحت مند انسان کی طرح محدود خوراک لیتے ہیں، جیل میں شاید وہ اس طرح ورزش نہیں کر پا رہے جس طرح وہ گھر میں کرتے تھے۔