کسی بھی غیر ملکی کو اجازت نہیں کہ وہ جعلی شناختی کارڈ استعمال کر ے ،سرفراز بگٹی

وزیر داخلہ سرفراز احمد بگٹی نے کہا ہے کہ حکومت جعلی کمپیوٹرائزڈ قومی شناختی کارڈ رکھنے والوں کے خلاف کریک ڈائون کرے گی۔

ایک نجی ٹیلی ویژن سے گفتگو کرتے ہوئے انہوں نے کہا کہ قانون نافذ کرنے والے ادارے طویل عرصے سے پاکستان میں مقیم غیر رجسٹرڈ اور غیر قانونی غیر ملکیوں کے خلاف کارروائی کر رہے ہیں۔

انہوں نے کہا کہ ہم پاکستان میں غیر ملکیوں کو درست دستاویزات کے ساتھ خوش آمدید کہیں گے۔

پاکستان میں دہشت گردی کے واقعات کے بارے میں ایک سوال کے جواب میں انہوں نے کہا کہ بہت سے غیر قانونی افغان باشندے دہشت گردی کی کارروائیوں اور اسٹریٹ کرائمز میں ملوث پائے گئے ہیں۔

ہولڈنگ سنٹرز کے حوالے سے انہوں نے کہا کہ ہولڈنگ سنٹرز میں افغان خاندانوں کو تمام مطلوبہ سہولیات فراہم کی جا رہی ہیں۔

غیر رجسٹرڈ لوگوں کو ان کے آبائی ملک منتقل کرنے کے ٹائم فریم کے بارے میں انہوں نے کہا کہ انہیں افغانستان واپس بھیجنے کے لیے تقریبا تین سے چار ماہ درکار ہوں گے۔

انہوں نے کہا کہ کسی افغان باشندے یا کسی بھی غیر ملکی کو پاکستان میں غیر قانونی کام کرنے کی اجازت نہیں دی جائے گی ۔

کسی بھی غیر قانونی و ریاست مخالف ایجنڈے میں ملوث افراد کے خلاف فی الفور کاروائی عمل میں لائی جائےگی ۔