جموں کے مسلمانوں کی نسل کشی کی مذمت کرتے ہیں، وزیراعظم آزاد کشمیر کا پیغام

اسلام آباد: وزیراعظم آزادکشمیر چوہدری انوارالحق نے کہا ہے کہ آج کے دن کنٹرول لائن کے دونوں طرف اور دنیا بھر میں مقیم کشمیری شہداء جموں کو بھرپورخراج عقیدت پیش کرتے ہیں،مسلمانان جموں کی بڑے پیمانے پر نسل کشی اور ان پر ڈھائے جانے والے بدترین مظالم کی شدید الفاظ میں مذمت کرتے ہیں۔

یوم شہداء جموں کے موقع پر اپنے پیغام میں وزیر اعظم آزاد کشمیر چوہدری انوارالحق نے کہا کہ جموں میں ستمبر سے 6نومبر 1947 تک تقریباً ڈھائی لاکھ مسلمانوں کا قتل عام ہوا،25 ہزار سےزیادہ خواتین کو اغوا کیا گیا اور لاکھوں کشمیریوں نے پاکستان کی جانب ہجرت کی،مسلمانوں کا یہ قتل عام ایک جامع اور منظم منصوبہ بندی کے تحت ہوا۔

وزیراعظم آزادکشمیر نے کہا کہ مسلمانوں کے قتل عام میں پٹیالہ فورسز، آرایس ایس اور دیگر انتہا پسند جتھے ملوث تھے،مسلمانوں کی اکثریت کو اقلیت میں بدلنے کے لئے سفاکیت کا مظاہرہ کیا گیا،آج ان مہاجرین کی نسلیں یہاں ہر شعبہ زندگی میں بھرپور نمائندگی کر رہی ہیں، شہداء کے مقدس مشن کی تکمیل کے لیے اپنی تمام تر صلاحیتیں اور وسائل بروئے کار لائیں گے۔