حماس رہنما اسماعیل ہنیہ کی ایرانی سپریم لیڈر آیت اللہ علی خامنہ ای سے ملاقات

حماس رہنما اسماعیل ہنیہ نے ایران کے سپریم لیڈر آیت اللہ علی خامنہ ای سے ملاقات کی ہے۔ غزہ کی صورت حال اور خطے کے منظر نامے کے حوالے سے یہ ملاقات انتہائی اہم رہی۔ 

غیر ملکی میڈیا رپورٹس کے مطابق ملاقات میں حماس رہنما نے ایرنی سپریم لیڈر کو غزہ اور اس سے متعلق امور کے بارے میں تازہ ترین صورتحال سے آگاہ کیا۔ نیز مغربی کنارے میں سامنے آنے والاے واقعات کے بارے میں بھی بتایا کہ کس طرح اسرائیلی جرائم میں مغربی کنارے میں بھی تیزی آ رہی ہے۔

آیت اللہ خامنہ ای نے اس موقع پر فلسطینی عوام کی ہمت و جرات کے لیے ان تحسین کی، تاہم انہوں نے غزہ میں جاری اسرائیلی جرائم پر افسوس ظاہر کیا اور اسرائیلی جرائم کو امریکی اور بعض دوسرے مغربی ملکوں کی حمایت کی بدولت قرار دیا۔

ایرنی سپریم لیڈر نے اس موقع پر فلسطین کے بارے میں اپنی مستقل پالیسی کا ذکر کیا اور صہیونی قوتوں کے خلاف فلسطینی مزاحمت کے لیے اپنی حمایت کا اعادہ کیا۔

واضح رہے اسماعیل ہنیہ کی علی خامنہ ای کے ساتھ غزہ میں ایک ماہ سے جاری صورت حال کے دوران پہلی ملاقات تھی۔ اس سے قبل ان کی ایک ملاقات ماہ جون میں رپورٹ کی گئی تھی۔

تہران کو فلسطینی تحریک مزاحمت حماس کے اہم ترین حامی ملکوں میں نمایاں حیثیت حاصل ہے۔ رواں ماہ کے دوران ایرانی حمایت یافتہ دورسی مزاحمتی گروپ بھی کھل کر حمایت کا اعلان کر رہے ہیں۔