چیئرمین جوائنٹ چیفس آف اسٹاف کمیٹی جنرل ساحر شمشاد مرزا نے چین کا سرکاری دورہ کیا سینٹرل ملٹری کمیشن کے وائس چیئرمین جنرل ھئی وی ڈونگ اور چیف آف جنرل لی ژھن لئی سے بھی ملاقات کی ۔

پاک فوج کے شعبہ تعلقات عامہ (آئی ایس پی آر)  کےمطابق جنرل ساحر شمشاد مرزا نے ملٹری کمیشن اور 11 ویں بیجنگ ژیانگ شان فورم میں علاقائی امن و استحکام  کیلئے پاکستان کے کردار پر اظہار خیال کیا، ملاقاتوں کے دوران دونوں اطراف سے متعدد شعبوں میں پاکستان اور چین کے گہرے اور تاریخی تعلقات کو سراہا گیا۔

آئی ایس پی آر کے مطابق ملاقات میں دوطرفہ اسٹریٹجک تعاون پر مبنی شراکت داری اور دفاعی تعاون میں پیش رفت کا اعتراف کیا گیا جبکہ چینی قیادت نے پاکستان کی علاقائی سالمیت اور خودمختاری پر حمایت  کیلئے  اپنے غیرمتزلزل عزم کا اعادہ بھی کیا۔ 

پشاور : خیبر پختونخوا پولیس نے صوبے میں پولیس افسران اور اہلکاروں کے لیے سوشل میڈیا کے استعمال پر پابندی عائد کر دی ہے۔ 

سینٹرل پولیس آفس کی جانب سے جاری کردہ ایک نوٹیفکیشن میں تمام رینک کے افسران اور اہلکاروں کو ٹک ٹاک، فیس بک، انسٹاگرام، واٹس ایپ اور یوٹیوب سمیت تمام سوشل میڈیا پلیٹ فارمز کے استعمال سے روک دیا گیا ہے۔

نوٹیفکیشن میں کہا گیا ہے کہ پولیس اہلکاروں کی جانب سے سوشل میڈیا پر اپنی تصاویر، ویڈیوز اور دیگر مواد شیئر کرنے سے محکمہ پولیس کی ساکھ مجروح ہوتی ہے اور یہ دیگر اہلکاروں کی زندگیوں کے لیے بھی خطرہ بن سکتا ہے۔

نوٹیفکیشن میں یہ بھی واضح کیا گیا ہے کہ پولیس اہلکاروں کو اپنی یونیفارم میں تصاویر یا ویڈیوز بنا کر سوشل میڈیا پر شیئر کرنے سے سختی سے منع کیا گیا ہے۔ اس کے علاوہ، پولیس اہلکاروں کو اپنے سوشل میڈیا اکاؤنٹس پر اسلحہ، پولیس بیج یا دیگر شناختی نشانوں کو بھی ظاہر کرنے سے روک دیا گیا ہے۔

سینٹرل پولیس آفس نے تمام ریجنل پولیس افسران اور ضلعی پولیس افسران کو ہدایت کی ہے کہ اپنے علاقوں میں اس پابندی کو سختی سے نافذ کریں اور خلاف ورزی کرنے والے اہلکاروں کے خلاف سخت کارروائی کریں۔

پاکستان تحریک انصاف ( پی ٹی آئی) کے چیئرمین بیرسٹر گوہر کاکہنا ہے کہ آج اگر کوئی بل پیش کیا جاتا ہے تو یہ آئین کی خلاف ورزی ہوگی۔

چیئرمین پی ٹی آئی بیرسٹر گوہر علی نے پارلیمنٹ ہاؤس میں میڈیا سے گفتگو کرتے ہوئے کہا کہ میں نہیں سمجھتا کہ آج آئین و قانون کے مطابق کوئی بل پیش کیا جاسکتا ہے، بل پیش کرنے کیلئے آئین و قانون میں طریقہ کار وضع ہے۔

بیرسٹر گوہر نے کہا کہ آئین کہتا ہے اسمبلی کے رولز کو فالو کیا جائے، بل لانے کیلئے ایوان سے منظوری ضروری ہے، حکومت کا مجوزہ ترمیمی بل ہمارے پاس ایجنڈے کی شکل میں نہیں آیا، حکومت کی جانب سے بل پیش کرنے سے پہلے کابینہ سے منظوری لازمی ہے، کل کابینہ کے اجلاس میں کسی بل کی منظوری نہیں دی گئی، اگر آج کوئی بل پیش کیا جاتا ہے تو یہ آئین کی خلاف ورزی ہوگی۔

واضح رہے کہ قومی اسمبلی اور سینیٹ کے اہم ترین اجلاس آج ہورہے ہیں جبکہ قومی اسمبلی میں آئینی ترمیم پیش کیے جانے کا بھی امکان ہے، قومی اسمبلی کے آج ہونے والے اجلاس میں آئینی پیکیج اور چیف جسٹس کو توسیع دینے کے حوالے سے آئینی ترامیم پیش کیے جانے کی افواہیں گرم ہیں جبکہ حکومت نے ترامیم کی منظوری کے لیے درکار اکثریت حاصل کرنے کا دعویٰ کیا ہے۔