نیوزی لینڈ کا بنگلہ دیش کے خلاف دو ٹیسٹ میچوں کی سیریز کے لئے سکواڈ کا اعلان

ویلنگٹن: نیوزی لینڈ نے بنگلہ دیش کے خلاف دو ٹیسٹ میچوں کی سیریز کے لئے سکواڈ کا اعلان کر دیا ہے۔ مچل سینٹنر اور راچن رویندرا کو رواں ماہ کے آخر میں بنگلہ دیش کے خلاف شیڈول دو ٹیسٹ میچوں کی سیریز کے لیے سکواڈ میں شامل کرلیاگیا ہے۔ نیوزی لینڈ ٹیم کے سلیکٹر سیم ویلز نے کہا ہے کہ مچل سینٹنر اور راچن وریندرا کی ٹیم میں شمولیت سے سکواڈ مضبوط ہو گا۔

مچل سینٹنر نے اپنے 24 ٹیسٹ میچز میں سے آخری 2021 میں کھیلا تھا جبکہ راچن رویندرا کو جنوری 2022 میں ماؤنٹ مونگانوئی میں بنگلہ دیش کے ہاتھوں شکست کے بعد ٹیسٹ ٹیم سے ڈراپ کر دیا گیا تھا۔ دونوں کھلاڑی نیوزی لینڈ ٹیم کے سپن یونٹ میں اعجاز پٹیل اور ایش سودھی کا ساتھ دیں گے ۔ سلیکٹر سیم ویلز نے کہا کہ ہم نے ایک ایسے سکواڈ کا انتخاب کیا ہے جو بنگلہ دیش میں مقابلہ کر سکتا ہے اور کامیاب ہو سکتا ہے۔

اعجازپٹیل، ایش سودی ، مچل سینٹنر، گلین فلپس اور راچن رویندرا کے ساتھ ہمارے پاس ایک مضبوط سپن یونٹ ہے جو سیریز کے دوران اچھی ورائٹی اور آپشنز پیش کرسکتاہے۔ کائل جیمیسن فروری میں بیک سرجری کے بعد ٹیسٹ سکواڈ میں واپس آئیں گے۔ وہ فاسٹ بائولنگ یونٹ میں ٹم ساؤتھی اور میٹ ہنری کے ساتھ شامل ہوں گے۔ انہوں نے کہا کہ فاسٹ بائولر ٹرینٹ بولٹ بنگلہ دیش کے خلاف ٹیم کو دستیاب نہیں ہوں گے۔