پاکستان کو چیلنجزسے نمٹنے کےلئے بیرونی تحفظ پر انحصار نہیں کرنا چاہئے،انوارلحق کاکڑ

نگران وزیر اعظم انوارالحق کاکڑ نے واضح طورپر کہا ہے کہ پاکستان ملک دشمنوں کی طرف سے پیدا کردہ خطرات سے نمٹنے کی بھرپور صلاحیت رکھتا ہے۔

انہوں نے آج(بدھ) اسلام آباد میں مارگلہ ڈائیلاگ میں ’’تبدیل ہوتی ہوئی دنیا کے ہمارے مستقبل پر اثرات‘‘ کے موضوع پر خطاب کرتے ہوئے کہا کہ ہمیں اس چیلنج سے نمٹنے کےلئے بیرونی تحفظ پر انحصار نہیں کرنا چاہئے۔

 انہوں نے کہا کہ پاکستان چیلنجوں کا مقابلہ کرنے کےلئے پراعتماد ہے اور خود پر انحصار کرتا ہے۔ وزیر اعظم نے کہا کہ پاکستان نے بیرونی جارحیت کےخطرات  بالکل محدود کردیئے ہیں۔

اقتصادی محاذ پر انہوں نے کہا کہ ملک کی زیادہ تر آبادی تیس سال سے کم عمر کی ہے جو چیلنجوں سے نمٹنے کی وسیع صلاحیت رکھتی ہے۔

 خطے میں روابط کی استعداد کار اور فوائد کو اجاگر کرتے ہوئے وزیراعظم نے کہا کہ اس حوالے سے بڑی رکاوٹ حل طلب تنازعہ کشمیرہے جس پر سنجیدگی سے توجہ دینے کی ضرورت ہے۔

 انہوں نے کہا کہ بھارت اور پاکستان کے درمیان اچھے اقتصادی اور معمول کے تعلقات کےلئے کشمیر سمیت تمام تنازعات کا حل ضروری ہے۔

 ہندوتوا کی طرف سے پیدا کردہ چیلنج پر تشویش کا اظہارکرتے ہوئے وزیر اعظم نے کہا کہ یہ نظریہ بالخصوص اسلام اور عیسائیت کو نشانہ بنارہا ہے۔

انہوں نے کہا کہ بھارت میں صرف اقلیتوں کو نشانہ نہیں بنایا جارہا بلکہ کینیڈا میں جو کچھ ہوا یہ اس کے خطرناک سیاسی عزائم کا صرف ابتدائی اظہار ہے۔

 چین ، امریکہ تعلقات میں کشیدگی پر تبصرہ کرتے ہوئے وزیر اعظم نے کہا کہ اس کشیدگی سے پاکستان جیسے ممالک کا کوئی فائدہ نہیں۔ انہوں نے کہا کہ پاکستان کسی تنازعے میں نہیں پڑنا چاہتا۔

وزیراعظم نے کہا کہ ہمار ے سامنے موسمیاتی تبدیلی جیسے کئی چیلنجز ہیں جنہیں کوئی ایک ملک یا چند ممالک حل نہیں کرسکتے ۔ انہوں نے کہا کہ موسمیاتی تبدیلی انسانیت کےلئے ایک سنگین خطرہ بن رہی ہے۔ انہوں نے اس مسئلے سے نمٹنے کےلئے عالمی رابطے اور تعاون پر زور دیا۔

 وزیر اعظم نے کہا کہ اسرائیل نہتے فلسطینیوں پر وحشیانہ بمباری کررہا ہے۔ انہوں نے ایک آزاد اور خود مختار فلسطینی ریاست کے قیام کے لئے پاکستان کے اصولی موقف کا اعادہ کیا۔