گلگت بلتستان کو نہایت مشکل چیلنجز کا سامنا ہے ،وزیر اعلی گلگت بلتستان

وزیر اعلیٰ گلگت بلتستان حاجی گلبر خان نے عوامی رابطہ مہم کے سلسلے میں عوامی ایکشن کمیٹی کے وفد کے ساتھ ملاقات کی،اس موقع پرصوبائی وزراءبھی موجود تھے۔وزیراعلیٰ گلبر خان نے گفتگو کرتے ہوئے کہا کہ گلگت بلتستان کو اس وقت بہت سے معاشی چیلنجز کا سامنا ہے جس کا تقاضا ہے کہ کچھ بروقت اور تلخ فیصلے کئے جائیں،

یہ وقت منفی سیاست کرنے کا نہیں بلکہ گلگت بلتستان کے وسیع تر مفاد میں عوامی حقوق کے تحفظ کےلئے ہمیں اتحاد و اتفاق کی ضرورت ہے۔ نگران وزیر اعظم انوار الحق کاکڑ نے دورہ گلگت بلتستان کے موقع پر صوبائی مالی مسائل اور اس سے منسلک گندم کی کمی دور کرنے کےلئے جو اعلان کیا تھا اس پر اب تک بوجوہ عملدرآمد نہیں ہوا، وزیر اعظم کے اعلانات کو عملی جامہ پہنانے کے حوالے سے ہم نے بعدمیں بھی بالمشافہ اور تحریری گزارش کی ہے جس پر وزیر اعظم نے واضح ہدایات دی ہیں تاہم اب تک عملی طور پر کوئی مثبت نتیجہ نہیں آیا ہے۔ بحیثیت عوامی نمائندے ہمیں گلگت بلتستان کے عوام کو درپیش مسائل کا بھرپور ادراک ہے۔

غریب عوام پر کسی قسم کا اضافی بوجھ نہیں ڈالنا چاہتے ہیں۔ ٹارگٹڈ سبسڈی کا مقصد ان مشکل حالات میں بھی مستحق طبقے کو ریلیف دینا ہے۔ وفاقی حکومت سے گلگت بلتستان کو درپیش مسائل کے پائیدار اور قابل عمل حل کےلئے تعاون کی درخواست کی ہے جس میں سب سے آسان اور قابل قبول طریقہ یہی ہوگا کہ جس طرح آزاد کشمیر کو این ایف سی ایوارڈ میں حصہ ملتا ہے اسی طرح گلگت بلتستان کو بھی این ایف سی میں حصہ ملے۔ اگر این ایف سی میں گلگت بلتستان کا شیئر مختص کیا جاتا ہے تو اس کی رقم ڈیڑھ سو ارب سے زیادہ کی بنتی ہے جس سے ہم اپنے عوام کو بہتر سہولیات اور ریلیف دے سکتے ہیں