ملک میں بڑی صنعتوں کی پیداوارمیں تین ماہ کے دوران 0.68 فیصد اضافہ

اسلام آباد: ملک میں بڑی صنعتوں کی پیداوارمیں جاری مالی سال کی پہلی سہ ماہی میں سالانہ بنیادوں پر0.68 فیصدکی نموریکارڈکی گئی ہے۔

پاکستان بیوروبرائے شماریات(پی بی ایس) کی جانب سے جاری رپورٹ کے مطابق جولائی سے لیکرستمبرتک کی مدت میں ملک میں بڑی صنعتوں کی پیداوارکااشاریہ (ایل ایس ایم آئی) 112.59 پوائنٹس ریکارڈکیاگیا جوگزشتہ مالی سال کی اسی مدت کے مقابلہ میں 0.68 فیصدزیادہ ہے، گزشتہ مالی سال کی اسی مدت میں بڑی صنعتوں کی پیداوارکااشاریہ (ایل ایس ایم آئی) 111.83 پوائنٹس ریکارڈکیاگیاتھا،ستمبر2023 میں بڑی صنعتوں کی پیداوارکااشاریہ 112.85 پوائنٹس ریکارڈکیاگیا جواگست کے مقابلہ میں 3.56 فیصدکم اورگزشتہ سال ستمبرکے مقابلہ میں 1.01 فیصدزیادہ ہے۔

اگست میں بڑی صنعتوں کی پیداوارکااشاریہ 117.02 پوائنٹس اورگزشتہ سال ستمبرمیں 111.73 پوائنٹس تھا۔مالی سال کی پہلی سہ ماہی میں خوراک کے شعبہ میں 0.61 فیصد، گارمنٹس 5.47 فیصد، پٹرولیم مصنوعات 0.86 فیصد، فارما 1.81 فیصد اور سیمنٹ کی پیداوارمیں 0.84 فیصد کی نموہوئی ، اس کے برعکس تمباکوکی پیداوارمیں 0.71 فیصد، ٹیکسٹائل 4.26 فیصد، آئرن اینڈ سٹیل 0.11 فیصد، برقی آلات 0.47 فیصد، آٹوموبائلز 1.45 فیصد، پیپراینڈ بورڈ 0.18 فیصد اورفرنیچر کی پیداوارمیں 2 فیصد کی کمی ہوئی۔